Գերմանիայի արտաքին գործերի նախարարությունը հայտարարություն է տարածել օրերս Վրաստանի խորհրդարանի խոսնակ Շալվա Պապուաշվիլիի՝ Գերմանիայի դեսպանի նկատմամբ մեղադրանքների վերաբերյալ։
«Արտաքին գործերի նախարարությունը վճռականորեն մերժում և դատապարտում է պարոն Պապուաշվիլիի անհիմն մեղադրանքները: Մենք մտահոգված ենք, որ ապատեղեկատվություն և պառակտիչ նարատիվներ տարածելով՝ նա ակտիվորեն խաթարում է Գերմանիա-Վրաստան հարաբերությունները: Մենք վճռականորեն մերժում ենք «Վրացական երազանքի» ներկայացուցիչների կողմից Գերմանիայի դեսպանի նկատմամբ շարունակվող ագրեսիվ հռետորաբանությունը: Թբիլիսիում Գերմանիայի դեսպանը ներկայացնում է Դաշնային կառավարության դիրքորոշումը: Գերմանիան վերահաստատում է իր կոչը Վրաստանի իշխանություններին դադարեցնել ԵՄ-ի և Գերմանիայի դիրքորոշումների ու քաղաքականության վերաբերյալ կեղծ նարատիվների տարածումը և փոխել իր ներկայիս քաղաքական կուրսը»,- ասված է հաղորդագրության մեջ։
Տեղեկացնենք, որ Պապուաշվիլին «Վրացական երազանքի» նախընտրական շտաբի մոտ օրերս տեղի ունեցած ընդհարման համար մեղադրել էր երկրում Գերմանիայի դեսպանին, իսկ ցուցարարներին անվանել «տիտուշկաներ»։
«Նախընտրական քարոզարշավի ընթացքում ծայրահեղականներին աջակցելը և օտարերկրյա դեսպանի կողմից բռնությունը չդատապարտելը ընտրություններին կոպիտ միջամտության օրինակ է, որը խախտում է Վիեննայի կոնվենցիան»,- գրել էր Պապուաշվիլին։
Հետևեք մեզ տելեգրամում
