Կատարի վարչապետ շեյխ Մուհամմեդ բին Աբդուլ Ռահման ալ Թանին հայտարարել է, որ Իսրայելի վարչապետ Բենյամին Նեթանյահուն Դոհայի վրա հարձակման համար «ամոթալի արդարացումներ» է օգտագործում։ Ալ-Թանին նաև Իսրայելի ղեկավարությանը մեղադրել է ամբարտավանության և սեփական անպատժելիությանը հավատալու մեջ։
Կատարի վարչապետը զուգահեռ է անցկացրել Թալիբանի հետ բանակցությունների հետ, որը նույնպես քաղաքական բյուրո ուներ Դոհայում։
«Եվ այս ուղին հանգեցրեց Աֆղանստանի վերաբերյալ համաձայնագրի կնքմանը, որը վերջ դրեց պատերազմին։ Տարիների ընթացքում Միացյալ Նահանգները երբեք չի հարձակվել բանակցողների վրա»,-ՄԱԿ-ի Անվտանգության խորհրդի նիստում ասել է Ալ Թանին՝ նշելով ԱՄՆ նախագահ Դոնալդ Թրամփի վարչակազմի հետ համագործակցությամբ ձեռնարկված ջանքերի հաջողությունը։
«Սա այն մոտեցումն է, որը մենք ունենք։ Սա այն մոտեցումն է, որը Իսրայելի վարչապետը փորձում է խեղաթյուրել»,-հավելել է Կատարի վարչապետը։
Նրա խոսքով՝ «միջազգային իրավունքի շարունակական խախտումները և բոլոր արժեքները խաթարող վարքագիծը միայն մեկ բան են ապացուցում. Իսրայելի ներկայիս ղեկավարները ամբարտավան են և կարծում են, որ անպատժելի են»։
Ալ-Թանին նաև ասել է, որ «Գազայում ցեղասպանությունից և աննախադեպ մարդասիրական աղետից» բացի, Իսրայելն այժմ «խաթարում է ամբողջ տարածաշրջանի կայունությունը»։
Հետևեք մեզ տելեգրամում
