Եղվարդում սեպտեմբերի 20-ին կանցկացվի «Armenia AirFest» փառատոնը, որն իր դռներն է բացում արդեն 6-րդ անգամ։ Այդ մասին հաղորդում է «Արմենպրեսը»։ Ավիացիայի, արկածային տուրիզմի և մշակույթի այս միջոցառումը դարձել է Հայաստանի ամենասպասված իրադարձություններից մեկը՝ ներգրավելով բազմաթիվ հյուրերի թե՛ Հայաստանից, թե՛ արտերկրից։
Միջոցառման կազմակերպիչ, Հայաստանի ընդհանուր ավիացիայի հիմնադրամի տնօրեն Արմեն Սարգսյանն այսօր ասուլիսի ժամանակ նշել է, որ բավական հագեցած ծրագիր է սպասվում։
«Այս տարվա փառատոնը խոստանում է լինել ավելի վառ։ Այն մեկնարկելու է ժամը 12։00-ին, լինելու է օդային ինքնատիպ շոու ինքնաթիռների, պարապլանների, օդապարիկների և ուղղաթիռների մասնակցությամբ։ Ունենք միջազգային մասնակից-գործընկերներ, որոնք գալու են ԱՄՆ-ից, Ռուսաստանից, Վրաստանից, Գերմանիայից։ Թռիչքներին քաղաքացիների մասնակցություն ևս նախատեսված է։ Դրա համար կարելի է գրանցվել ինչպես նախապես, այնպես էլ տեղում։ Բոլոր նրանք, ովքեր երազել են թռիչքներ իրականացնելու մասին, կարող են գալ, մասնակցել, որովհետև սա շատ լավ հնարավորություն է ավիացիային մոտ լինելու համար»,-նշել է Արմեն Սարգսյանը։
Միջոցառման համերգային հատվածն ապահովելու է Lav Eli խումբը` DJ Սիաննան։
Հետևեք մեզ տելեգրամում
