Վրաստանը մինչև 2025-ի սեպտեմբերի 1-ն ամբողջությամբ մարել է արտաքին պարտքը Ռուսաստանի և Փարիզյան ակումբի վեց այլ երկիր-պարտատերերի նկատմամբ՝ Վրաստանի պարտքի մի մասի վերակառուցման մասին 2004-ին ձեռք բերված համաձայնագրի շրջանակներում։ Այդ մասին հաղորդում է «Ինտերֆաքս»-ը՝ հղում անելով երկրի ֆինանսների նախարարության տվյալներին։
Ռուսաստանից բացի, մարվել են նաև Ադրբեջանի, Թուրքիայի, Ղազախստանի, Հայաստանի, Իրանի և Նիդեռլանդների նկատմամբ երկարամյա պարտքերը։ Օգոստոսի 1-ի դրությամբ այս երկրների նկատմամբ չմարված ընդհանուր պարտքը կազմել է 7.32 միլիոն դոլար, իսկ Ռուսաստանինը՝ 4 մլն դոլար։
Վճարումները ներառել են մինչև 1999 թվականը ստացված 160 մլն դոլարի պարտքեր, 1999-ից մինչև 2004-ի մայիսը կուտակված պարտավորությունների տոկոսներ, ինչպես նաև ավելի վաղ հաստատված գրաֆիկի համաձայն՝ 2004-2006-ին մարման ենթակա պարտքեր։ Վերակառուցումն իրականացվել է 2004-ի հունիսի 1-ից մինչև 2006-ի դեկտեմբերի 1-ը։ Մարման գրաֆիկը նախատեսում էր վճարումները կատարել 20 տարվա ընթացքում։
Վրաստանի ֆինանսների նախարությունը հայտնում է, որ վճարումների ընդհանուր գումարը գերազանցել է 225 մլն դոլարը։
2025 թվականի սեպտեմբերի 1-ի դրությամբ Վրաստանի արտաքին պետական պարտքը կազմել է 9 մլրդ դոլար՝ տարեսկզբից աճելով 5.8%-ով: Նշվում է, ո երկրի արտաքին պետական պարտքի արժութային կառուցվածքում գրեթե 70%-ը եվրոյով է:
Հետևեք մեզ տելեգրամում
