Իսպանիայի արտաքին գործերի նախարար Խոսե Մանուել Ալբարեսը մերժել է իր կոալիցիոն գործընկերների՝ Իսրայելի հետ դիվանագիտական հարաբերությունները խզելու կոչերը։
Ալբարեսը նշել է, որ Իսրայելի հետ հարաբերությունների խզումը ներկայումս օրակարգում չէ, սակայն ժամանակն է «վերջ դնել բնակչության հարկադիր տեղահանմանը և շրջափակմանը, որը խոչընդոտում է Գազայի հատված սննդի բնականոն մատակարարմանը»։
«Ժամանակն է կոնկրետ որոշումներ կայացնել և հստակ ազդանշան ուղարկել Իսրայելին. նրանք չեն կարող ակնկալել նորմալ հարաբերություններ Եվրամիությունից, կարծես ոչինչ չի պատահել»,-ընդգծել է իսպանացի նախարարը։
Նշենք, որ սեպտեմբերի սկզբին Իսպանիայի վարչապետ Պեդրո Սանչեսը հայտարարեց մի շարք միջոցառումների մասին, որոնք ուղղված են Իսրայելի վարչապետ Բենյամին Նեթանյահուի վրա ճնշումը մեծացնելուն։
Իսպանիան, մասնավորապես, որոշել է արգելել զենք տեղափոխող իսրայելական նավերին և ինքնաթիռներին մուտք գործել Իսպանիայի նավահանգիստներ կամ մուտք գործել Իսպանիայի օդային տարածք։ Մադրիդը նաև չեղարկել է իսրայելական զենքի ընկերության հետ կնքված 700 միլիոն եվրոյի պայմանագիրը։
Հետևեք մեզ տելեգրամում
