Սեպտեմբերի 22-ին Փարիզում կայացավ հեղինակավոր «France Football»-ի «Ոսկե գնդակ»-ի պաշտոնական մրցանակաբաշխությունը: «Շատլե» թատրոնում կայացած մրցանակաբաշխության ժամանակ տղամարդկանց ֆուտբոլի «Ոսկե գնդակ»-ը նվաճեց ՊՍԺ-ի հարձակվող Ուսման Դեմբելեն:
Իսկ կանանց ֆուտբոլի «Ոսկե գնդակ»-ին այս անգամ արժանացավ Իսպանիայի հավաքականի և «Բարսելոնա»-ի խաղացող Այտանա Բոնմատին, որն այս մրցանակին արժանանում է երրորդ տարին անընդմեջ:
Տարվա լավագույն մարզիչը տղամարդկանց ֆուտբոլում ՊՍԺ-ի գլխավոր մարզիչ Լուիս Էնրիկեն է, իսկ կանանց ֆուտբոլում` Անգլիայի կանանց ֆուտբոլի ազգային հավաքականի գլխավոր մարզիչ Սարինա Վիգմանը:
Լավագույն տղամարդ դարպասապահ ճանաչվեց «Մանչեսթեր Սիթի»-ի խաղացող Ջանլուիջի Դոնարուման, որը նախորդ մրցաշրջանն անցկացրել է ՊՍԺ-ի կազմում, իսկ կանանց ֆուտբոլի լավագույն դարպասապահի մրցանակին արժանացավ «Չելսի»-ից Հանա Հեմփթոնը:
Ներկաները նաև հարգանքի տուրք մատուցեցին կյանքից անժամանակ հեռացած Պորտուգալիայի ազգային թիմի ֆուտբոլիստ, «Լիվերպուլ»-ի հարձակվող Դիոգու Ժոտայի և «Մանչեսթեր Յունայթեդ»-ի նախկին հարձակվող Դենիս Լոուի հիշատակին:
Հետևեք մեզ տելեգրամում
