Բելգիայի Թագուհի Մաթիլդան հոկտեմբերի 13-15-ը աշխատանքային այցով կլինի Հայաստանում՝ որպես ՄԱԿ-ի Կայուն զարգացման նպատակների պաշտպան։Այդ մասին հաղորդագրություն է տարածել Բելգիայի թագավորական պալատի մամուլի ծառայությունը:
Ըստ հաղորդագրության՝ այցը դառնալու է հնարավորություն՝ ընդգծելու «Կայուն զարգացման 2030 օրակարգ»-ի կարևորությունը, ինչպես նաև Հայաստանում տարբեր ոլորտներում գործող նախաձեռնությունների շուրջ ուղիղ երկխոսություն ծավալելու համար։ Դրանց թվում են նորարարությունը, սոցիալական ներառումը, առողջապահությունը, կրթությունն ու շրջակա միջավայրի պահպանումը։
«Այս այցը հնարավորություն կընձեռի ընդգծել Կայուն զարգացման 2030 օրակարգի կարևորությունը և ուղիղ երկխոսություն հաստատելու հայ հասարակության բազմաթիվ դերակատարների հետ, որոնք ներգրավված են նորարարության, սոցիալական ներառման, առողջապահության, կրթության և շրջակա միջավայրի պահպանության ոլորտներում»,-ասված է մամուլի հաղորդագրության մեջ։ Թագուհին նախատեսում է հանդիպել Երևանի պետական համալսարանի ուսանողների հետ՝ զրուցելու նրանց տեսակետների մասին, որոնք առնչվում են կայուն զարգացման նախաձեռնություններին։ Այցի շրջանակում Մաթիլդան այցելելու է նաև «ԹՈՒՄՈ» ստեղծարար տեխնոլոգիաների կենտրոն։
Թագուհու ծրագրի առանցքում են լինելու բնապահպանական հարցերը։ Նա այցելելու է Գեղարքունի մարզ, մասնավորապես Սևանա լճի տարածք՝ կապված 2026 թվականին Կենսաբազմազանության COP-17 համաժողովը հյուրընկալելու Հայաստանի պատրաստակամության հետ։
Թագուհին ծանոթանալու է «My Forest Armenia» կազմակերպության կողմից իրականացվող անտառապատման նախաձեռնությանը, որը նպատակ ունի կանխել անապատացման գործընթացը և մեղմել կլիմայի փոփոխության վնասակար ազդեցությունները։ Թագուհին Հայաստան այցելության ընթացքում անդրադառնալու է նաև փախստականների սոցիալ-տնտեսական ներառման հարցերին։
Նախատեսված են նաև բարձր մակարդակի հանդիպումներ Հայաստանի ղեկավարության հետ՝ նպատակ ունենալով քննարկել Կայուն զարգացման նպատակների իրագործման ընթացքը, երկրի առաջնահերթությունները և առկա մարտահրավերները՝ 2030 թվականի տեսլականի համատեքստում։
Հետևեք մեզ տելեգրամում
