Ֆրանսիայի Ազգային ժողովում սեպտեմբերի 18-ին կայացած խորհրդաժողովում բարձրացվել է բռնի տեղահանված արցախցիների իրավունքների պաշտպանության հարցը՝ արցախահայության հայրենազրկումից երկու տարի անց։ «Արցախ միությունը» հայտնում է, որ նախաձեռնողը եղել է պատգամավոր և Ֆրանսիա–Հայաստան բարեկամության խմբի փոխնախագահ Էմանուել Մանդոնը։
«Միջոցառմանը մասնակցել են ֆրանսիայի, Շվեյցարիայի, Բելգիայի և Եվրախորհրդարանի պատգամավորներ, դիվանագետներ, փորձագետներ, համալսարանականներ, մտավորականներ, լրագրողներ, ինչպես նաև տեղական ինքնակառավարման մարմինների բարձր ներկայացուցիչներ, որոնք վերահաստատեցին իրենց պատրաստակամությունը գործնական աջակցություն ցուցաբերելու Արցախի բռնի տեղահանված ժողովրդի վերադարձի իրավունքին»,–նշվում է հաղորդագրության մեջ։
Խորհրդաժողովի մեկնարկային հատվածում քննարկվել են Հարավային Կովկասում ընթացող աշխարհաքաղաքական փոփոխությունները և դրանց ազդեցությունը արցախահայության վրա։ Ըստ մասնակիցների՝ բռնի տեղահանության համար պատասխանատվության բացակայությունը վտանգի տակ է դրել միջազգային իրավակարգը։ Այս համատեքստում ընդգծվել է, որ ինչպես ֆրանսիացի, այնպես էլ եվրոպացի պատգամավորները պարտավորվել են թույլ չտալ արցախահայության նկատմամբ իրականացված էթնիկ զտման մոռացության մատնումը և շարունակելու են ճնշում գործադրել իրենց կառավարությունների վրա՝ միջազգային իրավունքը հարգելու ուղղությամբ գործնական քայլեր ձեռնարկելու համար։
Խորհրդաժողովի երկրորդ հատվածում ուշադրության կենտրոնում է գտնվել խորհրդարանական դիվանագիտության դերը։ Շեշտադրվել է, որ անհրաժեշտ է ամրապնդել կապերը եվրոպական խորհրդարանների և Արցախի Հանրապետության խորհրդարանի միջև՝ վերադառնալու իրավունքն արտաքին քաղաքական օրակարգում պահելու և միաժամանակ հայ ռազմագերիների ու քաղաքական բանտարկյալների անհապաղ ազատ արձակումը պահանջելու համար։ Առանձին անդրադարձ է կատարվել Ֆրանսիա–Արցախ բարեկամության շրջանակի նախաձեռնությանը։ Այն հանդես է եկել նախաձեռնությամբ՝ ֆրանսիացի օրենսդիրների ստորագրություններ հավաքագրելու նպատակով՝ ի պաշտպանություն Արցախի բռնի տեղահանված բնակչության վերադարձի իրավունքի, ինչպես նաև Բաքվում պահվող հայ գերիների ազատ արձակման պահանջով։
Միջոցառումն ամփոփել է Ֆրանսիայում Արցախի ներկայացուցիչ Հովհաննես Գևորգյանը, ով իր երախտագիտությունն է հայտնել մասնակիցներին՝ հորդորելով շարունակել Արցախի արդար պայքարը. «Քաղաքականությունն այն հզոր ուժն է, որ ունակ է վճռական գործողությամբ փոխել իրականությունը, ուստի առաջարկում եմ, որ համարձակվենք պայքարել բռնության նկատմամբ արդարության հաղթանակն ապահովելու համար։
Հետևեք մեզ տելեգրամում
