Վրաստանում շարունակում է նոր թափ ստանալ կառավարության և այդ երկրում Գերմանիայի դեսպանի միջև հակասությունը։ Գերմանիայի դեսպանը սեպտեմբերի 24-ին կանչվել էր ԱԳՆ, որտեղ նրան ասել էին, որ «Վիեննայի կոնվենցիայի համաձայն՝ դիվանագիտական առաքելության աշխատակիցը պետք է հարգի ընդունող պետության օրենքներն ու կանոնակարգերը և չպետք է միջամտի ընդունող պետության ներքին գործերին»։
Դեսպան Պետեր Ֆիշերը սոցիալական ցանցերում հաղորդագրություն էր հրապարակել առ այն, որ Վրաստանի ԱԳՆ-ն նրան կանչել է առանց որևէ պատճառի և ենթարկել է հարձակումների՝ մեղադրելով արմատական ընդդիմությանն աջակցելու մեջ։
«Ես լիովին հերքել եմ Գերմանիայի և իմ դեմ անհիմն հարձակումները և մեղադրել եմ կառավարությանն ու «Վրացական երազանքի» ներկայացուցիչներին գերմանա-վրացական հարաբերությունների նոր ցածր կետի համար։ Նրանք իրենց գործողություններով և հռետորաբանությամբ առաջացրել են սա և փակում են դեպի Եվրամիություն տանող ճանապարհը։ Ինձ չլսեցին։ Ես արմատական չեմ։ Գերմանիան մնում է բարեկամ»,-գրել է Պետեր Ֆիշերը։
Գերմանիայի ԱԳՆ-ն հայտարարություն է տարածել, որում ընդգծել է, որ Պետեր Ֆիշերը ներկայացնում է Գերմանիայի կառավարության պաշտոնական դիրքորոշումը և գործում է Վիեննայի կոնվենցիային լիովին համապատասխան։
Հետևեք մեզ տելեգրամում
