Թուրք ջրասուզորդները նամազ են արել ջրի տակ (Վիդեո)

Թուրքիայի Մուղլա նահանգում գտնվող Սարըյարլար գյուղում, որն ափամերձ է Էգեյան ծովին, հետաքրքիր դեպք է տեղի ունեցել։ Սաքարյա Սերդիվան ստորջրյա խմբի ջրասուզորդները, սուզվել են Էգեյան ծովի ջրերի մեջ և ստորջրյա նամազ արել։ Այդ մասին հայտնում է «Ermenihaber.am»-ը։

Նամազը նշանակում է պարտադիր աղոթք իսլամական կրոնում։ Մուսուլմաններն այն անում են օրական 5 անգամ՝ որպես Ալլահին երկրպագելու և հոգևոր մաքրություն ստանալու եղանակ:

Ջրասուզորդների նամազի տեսանյութը լայնորեն տարածվել է սոցիալական ցանցերում։ Խմբի անդամները նշել են, որ իրենց այդ ակցիայի նպատակն է ցույց տալ այն գաղափարը, որ բոլոր պայմաններում էլ հնարավոր է նամազ անել։

Ըստ նրանց՝ նամազ չանելու համար չկա որևէ արդարացում, այն պիտի արվի թե՛ ջրում և թե՛ ցամաքում։