Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի հանդիպումից հետո երկու երկրների միջև ստորագրվել է էներգետիկ ոլորտում համագործակցության մասին փաստաթուղթ։ Այդ մասին հայտնում է «Ermenihaber.am»-ը։
Էներգետիկայի և բնական հանածոների նախարար Ալփարսլան Բայրաքթարի հայտարարության համաձայն՝ Թուրքիայի և ԱՄՆ-ի միջև կնքվել է «Ռազմավարական քաղաքացիական միջուկային համագործակցության» մասին փոխըմբըռնման հուշագիր:
Նա երկու երկրների միջև առկա համագործակցությունը որակել է արմատական և բազմաճյուղ և հավելել, որ այն էլ ավելի է խորանալու միջուկային էներգիայի ոլորտում:
«Մաղթում եմ, որ համաձայնագրի շրջանակներում իրականացվելիք աշխատանքներն առաջիկա ժամանակաշրջանում երկու երկրների համար լինեն փոխադարձ շահեկան»,-հավելել է Բայրաքթարը:
Նշենք, որ հուշագրի տակ իրենց ստորագրություններն են դրել Թուրքիայի էներգետիկայի և բնական հանածոների նախարարն ու ԱՄՆ արտգործնախարար Մարկո Ռուբիոն:
Հետևեք մեզ տելեգրամում
