Վրաստանի իշխանությունները կխուսափեն Ուկրաինայի նախագահ Վլադիմիր Զելենսկու հետ բանավիճելուց՝ չնայած նրա անհեթեթ հայտարարություններին։ Այս մասին ասել է Վրաստանի վարչապետ Իրակլի Կոբախիձեն։
«Ես չեմ ուզում բանավեճի մեջ մտնել Վլադիմիր Զելենսկու հետ։ Նա պատերազմող երկրի նախագահ է, ուստի ինչ հայտարարություն էլ որ նա անի, չեմ կարծում, որ անհրաժեշտ է դրան պատասխանել»,-ասել է Կոբախիձեն։
Հիշեցնենք, որ Զելենսկին, ելույթ ունենալով Նյու Յորքում ՄԱԿ-ի Գլխավոր ասամբլեայում, հայտարարել էր, որ «Եվրոպան արդեն կորցրել է Վրաստանը, և մարդու իրավունքների և եվրոպական կառավարման ոճի հետ կապված իրավիճակն այնտեղ միայն վատթարանում է»։
Ինչ վերաբերում է ժողովրդավարության և մարդու իրավունքների հետ կապված իրավիճակին, վարչապետի խոսքով, Ուկրաինան այս առումով գտնվում է ողբերգական վիճակում՝ թե՛ ժողովրդավարության, թե՛ մարդու իրավունքների տեսանկյունից։
«Երբ նման ժամանակներում խոսում են Վրաստանում ժողովրդավարության և մարդու իրավունքների մասին, դա ինքնին անհեթեթություն է։ Վրաստանը անվիճելի առաջատարն է ԵՄ թեկնածու երկրների շարքում, այդ թվում՝ ժողովրդավարության և մարդու իրավունքների առումով։ Մենք տասը գլուխ բարձր ենք բոլոր թեկնածու երկրներից՝ թե՛ մարդու իրավունքների, թե՛ ժողովրդավարության առումով»,-հայտարարել է Կոբախիձեն։
Հետևեք մեզ տելեգրամում
