Իրանի արտաքին գործերի նախարար Աբբաս Արաղչին անդրադարձել է Իրանի դեմ պատժամիջոցների վերականգման մեխանիզմի՝ «snapback mechanism» գործարկմանը՝ նշելով, որ նպատակը շանտաժն է և Իրանից զիջումների կորզումը։
«Մեր բոլոր առաջարկները մերժվեցին։ Չնայած որոշ եվրոպական երկրներ արտաքինից դրական վերաբերմունք էին ցուցաբերում, սակայն չկարողացան համոզել ամերիկյան կողմին։ Նյու Յորքում մեզ համար վերջնականապես պարզ դարձավ, որ նրանց նպատակը շանտաժն է և զիջումների կորզումը Իրանից։ Նրանք ակնկալում էին, որ Իրանն ամբողջությամբ կհանձնի իր միջուկային նյութերը, իսկ փոխարենը «Snapback mechanism»-ի մեխանիզմը կհետաձգվի ընդամենը մի քանի ամսով։ Մենք հակադրվեցինք այդ ճնշումներին և երբեք չենք ընդունի նման նվաստացուցիչ պահանջներ։ Մենք ներկայացրել ենք կառուցողական առաջարկներ, սակայն նրանք անգամ չցանկացան դրանք քննարկել։ Անվտանգության խորհրդում նույնպես միաձայնություն չկա։ Խորհրդի երկու մշտական անդամները (Չինաստանը և Ռուսաստանը) բացահայտորեն դեմ են արտահայտվել «Snapback mechanism»-ի ակտիվացմանը՝ այն համարելով անօրինական։ Ակնհայտ է, որ այս քայլի համար բավարար կոնսենսուս գոյություն չունի, և հարցն իրավական լուրջ մարտահրավեր է ՄԱԿ-ի Անվտանգության խորհրդի համար։ Մեր տեսակետից՝ այս մեխանիզմն այժմ ակտիվացված չէ»։
Նշենք, որ «Snapback mechanism»-ը 2015 թ․ Իրանի միջուկային համաձայնագրի դրույթ է, որը նախատեսում է ՄԱԿ-ի բոլոր պատժամիջոցների ավտոմատ վերականգնում Իրանի նկատմամբ։ ՄԱԿ-ի Անվտանգության խորհրդի նիստի քվեարկության արդյունքում «Snapback mechanism» ուժի մեջ է մտել։
Հետևեք մեզ տելեգրամում
