Վրաստանի վարչապետ Իրակլի Կոբախիձեն լրագրողների հետ զրույցում հայտարարել է, թե Եվրոպական քաղաքական համայնքի գագաթնաժողովի շրջանակներում մի շարք բարձրաստիճան առաջնորդներ պատրաստակամություն են հայտնել վերանայել հարաբերությունները և քննարկում սկսել Վրաստանի՝ Եվրամիությանը անդամակցելու ձգտումներին վերաբերող բոլոր հարցերի շուրջ։
«Մենք հնարավորություն ունեցանք անմիջականորեն խոսել ավելի քան 30 առաջնորդների հետ, և մենք բոլոր այդ առաջնորդների հետ խոսեցինք մեր ազգային շահերի, Վրաստանի և Եվրամիության միջև հարաբերությունների վերանայման անհրաժեշտության և հեռանկարների մասին։ Մենք հանդիպումներ ունեցանք Եվրոպայի խորհրդի և ԵԱՀԿ գլխավոր քարտուղարների հետ։ Մենք պատրաստ ենք հրապարակային, բաց, թափանցիկ քննարկումների։ Սա բացարձակապես անհրաժեշտ է Վրաստանի և Եվրամիության միջև հարաբերությունների վերականգնման համար։
Հարաբերությունների վերաբեռնումը մեր բարձրացրած հիմնական հարցերից մեկն էր, չնայած նրանց կողմից նույնպես նախաձեռնություններ եղան վերանայել հարաբերությունները և քննարկում սկսել Վրաստանի՝ Եվրամիությանը անդամակցելու ձգտումներին վերաբերող բոլոր թեմաների շուրջ. լավ է, որ մենք դրական ազդակներ ենք տեսել այս ամենում»,-ասել է Վրաստանի վարչապետը։
Կոբախիձեն նշել է, որ Վրաստանի՝ Եվրամիությանը ինտեգրումը Վրաստանի արտաքին քաղաքականության առաջնահերթությունն է։
«Իհարկե, սա չի կարող տեղի ունենալ առանց առողջ քննարկման։ Մենք հաստատում ենք մեր պատրաստակամությունը կրկին առողջ քննարկում սկսելու Եվրոպական Միության կառույցների հետ բոլոր թեմաների շուրջ»,- հայտարարել է Վրաստանի կառավարության ղեկավարը։
Հետևեք մեզ տելեգրամում
