ԵՄ արտաքին գործերի և անվտանգության քաղաքականության գերագույն ներկայացուցիչ և Եվրոպական հանձնաժողովի փոխնախագահ Կայա Կալասը և ԵՄ ընդլայնման հարցերով հանձնակատար Մարթա Կոսը համատեղ հայտարարություն են արել Վրաստանում ՏԻՄ ընտրությունների վերաբերյալ։
«Ամիսներ շարունակ անկախ լրատվամիջոցների վրա հարձակումները, քաղաքացիական հասարակությանն ուղղված օրենքների ընդունումը, հակառակորդների և ակտիվիստների բանտարկությունը կամ իշխող կուսակցության օգտին ընտրական օրենսգրքում կատարված փոփոխությունները կտրուկ նվազեցրին մրցակցային ընտրություններ անցկացնելու հնարավորությունը։ Ընդդիմության մեծ մասը բոյկոտեց այս ընտրությունները, և մասնակցությունը համեմատաբար ցածր էր»,-նշված է ընդհանուր հայտարարությունում։
Հաղորդագրության մեջ նշվում է նաև, որ Վրաստանի իշխանությունների կողմից միջազգային դիտորդներին, մասնավորապես՝ ԵԱՀԿ/ԺՀՄԻԳ-ին, ժամանակին հրավիրելուց հրաժարվելը խաթարել է ընտրական գործընթացի թափանցիկությունը և խոչընդոտել հավաստի միջազգային մոնիթորինգին։
«Մենք կոչ ենք անում հանգստության և զսպվածության հետընտրական շրջանում և կոչ ենք անում իշխանություններին պաշտպանել քաղաքացիների հավաքների և խոսքի ազատության իրավունքները։ Անհրաժեշտ է կառուցողական և ներառական երկխոսություն, որը կներգրավի բոլոր քաղաքական գործիչներին և քաղաքացիական հասարակությանը, և մենք կոչ ենք անում բոլոր կողմերին զերծ մնալ բռնությունից»,-նշվում է հայտարարության մեջ։
Եվրոպացի պաշտոնյաները հաղորդագրության մեջ անդրադարձել են նաև Վրաստանում ԵՄ դեսպանի նկատմամբ իշխանության հայտարարություններին և մեղադրանքներին։
«Եվրամիությունը վճռականորեն մերժում և դատապարտում է Վրաստանում ԵՄ-ի դերի վերաբերյալ ապատեղեկատվությունը և դատապարտում է Վրաստանում Եվրամիության դեսպանի դեմ անձնական հարձակումները»,-ասված է հաղորդագրությունում։
Հետևեք մեզ տելեգրամում
