Պաղեստինի նախագահ Մահմուդ Աբբասը կոչ է արել միասնական պետություն ստեղծելու համար Գազայի հատվածը վերամիավորվել Հորդանան գետի Արևմտյան ափի հետ՝ Արևելյան Երուսաղեմ մայրաքաղաքով։
«Գազայի հատվածի նկատմամբ ինքնիշխանությունը պատկանում է Պաղեստինի պետությանը, և նրա կապը Արևմտյան ափի հետ պետք է վերականգնվի պաղեստինյան օրենքների և պետական ինստիտուտների միջոցով»,-WAFA լրատվական գործակալությանը տված հարցազրույցում ասել է Աբբասը՝ հավելելով, որ Ռամալլահում կառավարության կողմից ստեղծված Պաղեստինի ինքնավարության կոմիտեն «պատրաստ է ստանձնել Գազայի հատվածի կառավարումը՝ միասնական պաղեստինյան անվտանգության ուժերի աջակցությամբ»։
Աբբասը բարձր է գնահատել ԱՄՆ նախագահ Դոնալդ Թրամփի և բոլոր միջնորդների ջանքերը՝ Գազայի հատվածում պատերազմը դադարեցնելու, իսրայելական զորքերը Գազայի հատվածից դուրս բերելու, բնակչությանը մարդասիրական օգնության մատակարարումները ընդլայնելու և գերիների փոխանակման վերաբերյալ համաձայնության հասնելու համար։
«Հուսով եմ, որ այս ջանքերը նախաբան կլինեն քաղաքական կարգավորմանը հասնելու համար, որը կվերջացնի իսրայելական օկուպացիան և կհանգեցնի անկախ պաղեստինյան պետության ստեղծմանը 1967 թվականի հունիսի 4-ի սահմաններով և Արևելյան Երուսաղեմ մայրաքաղաքով»,-ասել է Աբբասը։
Հետևեք մեզ տելեգրամում
