Թուրքիայի գլխավոր ընդդիմադիր, քեմալական «Ժողովրդահանրապետական» կուսակցության (ԺՀԿ/CHP) փոխնախագահ Վելի Աղբաբան անդրադարձել է Թուրքիայի վիճակագրական ծառայության (TÜİK) հրապարակած գործազրկության տվյալներին։
Աղբաբան տարածած գրավոր հայտարարության մեջ նշել է, որ Թուրքիայում 2020թ․ փետրվարի դրությամբ 15 և բարձր տարիք ունեցող գործազուրկ քաղաքացիների թիվը կազմում էր 4 մլն 228 հազար։ Մինչդեռ Թուրքիայի վիճակագրական ծառայության հրապարակած նոր տվյալներով` այդ թիվը ռեկորդային աճ է գրանցել՝ կազմելով 9 մլն 39 հազար։
«Թուրքիայում ընդհանուր գործազուրկների թիվը նույնիսկ գերազանցել է 8․8 մլն բնակչություն ունեցող Ավստրիային»,- ասել է նա։
Նրա խոսքով՝ Թուրքիան և՛ երկնիշ գնաճով, և՛ գործազրության բարձր մակարդակով անդունդի եզրին է։
Աղբաբան նաև հայտնել է, որ Թուրքիայում փողոցներում աշխատող 6 մլն քաղաքացի չունի աշխատանքային գրանցում։
«Գրանցում չունեցող շուրջ 1․5 մլն քաղաքացի համավարակի ընթացքում գործազուրկ է դարձել։ Մոտ 18 մլն մարդ զրկվել է աշխատանքից և եկամուտից»,-գրել է նա։
Հետևեք մեզ տելեգրամում
