Հայաստանի և Ադրբեջանի միջև խաղաղության համաձայնագրից հետո անհրաժեշտ է առաջ նայել և դիտարկել տարածաշրջանի զարգացումը որպես ընդհանուր տարածք։ Այս մասին հայտարարել է Վրաստանի խորհրդարանի խոսնակ Շալվա Պապուաշվիլին՝ խոսելով Վրաստան այցելած Հայաստանի արտգործնախարարի հետ այսօր կայանալիք հանդիպմանը քննարկվելիք թեմաների մասին։
Պապուաշվիլիի խոսքով՝ թե՛ Հայաստանը, թե՛ Ադրբեջանը ճիշտ քաղաքականություն են վարում այն առումով, որ ձգտում են համագործակցել բոլոր կողմերի և գործընկերների հետ՝ հանուն իրենց ժողովուրդների բարօրության։
«Հայաստանի և Ադրբեջանի միջև խաղաղության համաձայնագրի կնքումից հետո մենք պետք է առաջ նայենք և դիտարկենք տարածաշրջանի զարգացումը որպես համատեղ տարածք։ Մենք բոլորս պետք է ամրապնդենք միմյանց այն գործում, որը կարևոր է յուրաքանչյուր երկրի համար։ Խոսքը ինքնիշխանության ամրապնդման և բնակչության բարեկեցության բարելավման մասին է։ Այս առումով մենք տեսնում ենք, որ և՛ Հայաստանը, և՛ Ադրբեջանը ճիշտ քաղաքականություն են վարում՝ ձգտելով համագործակցել բոլոր նրանց հետ, ովքեր աշխատում են իրենց ժողովուրդի բարօրության համար։ Նրանք չեն վարվում մեր արտաքինից կառավարվող արմատական ընդդիմության նման, որը կարծում է, որ այլ տարբերակ չկա, քան սպասել Բրյուսելից հրահանգների։ Հետևաբար, մենք կքննարկենք նաև այս հարցերը՝ ինչպես են նրանք գնահատում տարածաշրջանում առկա դինամիկան և ինչ ընդհանուր ծրագրեր ունենք», – հայտարարել է Շալվա Պապուաշվիլին։
Հետևեք մեզ տելեգրամում
