Ադրբեջանի նախագահ Իլհամ Ալիևը դատապարտել է Ուկրաինայի վրա Ռուսաստանի կողմից իրականացված ավիահարվածը, որի հետևանքով վնասվել է Ադրբեջանի դեսպանատունը։
Ուկրաինայի նախագահ Վլադիմիր Զելենսկին այս հայտարարությունն արել է իր ադրբեջանցի գործընկերոջ հետ զրույցից հետո։
«Ես խոսեցի Ադրբեջանի նախագահ Իլհամ Ալիևի հետ։ Շնորհակալություն եմ հայտնում մեր ժողովրդին ցուցաբերած աջակցության և համակրանքի համար»,-ասել է Զելենսկին՝ նշելով, որ այս գիշեր Ռուսաստանը հարյուրավոր անօդաչու թռչող սարքեր և հրթիռներ, այդ թվում՝ բալիստիկ հրթիռներ է օգտագործել ուկրաինացիների դեմ։
«Ցավոք, կան ավերածություններ և վնասներ, այդ թվում՝ Ադրբեջանի դեսպանատանը։ Պարոն նախագահը դատապարտեց այս հարձակումը և ընդգծեց, որ սա առաջին դեպքը չէ, երբ ռուսները թիրախավորում են դեսպանատան շենքը և Ադրբեջանի հետ կապված այլ օբյեկտներ»,-հավելել է Ուկրաինայի նախագահը։
Երկու նախագահները, ի թիվս այլ հարցերի, քննարկել են նաև երկկողմ հարաբերությունները և գործընկերության զարգացումը։
«Երկկողմ համագործակցության բոլոր ոլորտներում իսկապես կանաչ լույս կա։ Կա լավ ներուժ, և մենք այն կիրականացնենք»,-եզրափակել է Զելենսկին։
Հետևեք մեզ տելեգրամում
