ՀԱՊԿ-ի նոր գլխավոր քարտուղար կլինի Ղրղզստանի ներկայացուցիչը

ՀԱՊԿ-ի նոր գլխավոր քարտուղար է նշանակվելու կազմակերպության ներկայիս գլխավոր քարտուղարի տեղակալը՝ Ղրղզստանի ներկայացուցիչ Թաալաթբեկ Մասադիկովը։ «ՌԻԱ Նովոստի»-ն, հղում կատարելով ՌԴ նախագահի օգնական Յուրի Ուշակովին, հայտնում է, որ Մասադիկովը պաշտոնը կստանձնի 2026 թվականի հունվարի 1-ին։

Ուշակովի խոսքով՝ արդեն ընդունվել է որոշումը, որ Մասադիկովը, որը ներկայում զբաղեցնում է ՀԱՊԿ գլխավոր քարտուղարի տեղակալի պաշտոնը, կփոխարինի գործող գլխավոր քարտուղարին։

ՌԴ նախագահի օգնականը նաև տեղեկացրել է, որ Հայաստանը չի մասնակցելու նոյեմբերի 27-ին Ղրղզստանում կայանալիք ՀԱՊԿ գագաթնաժողովին, սակայն միևնույն ժամանակ Երևանը դեմ չէ գագաթնաժողովում համաձայնեցված փաստաթղթերի ընդունմանը։

Հիշեցնենք, որ Նիկոլ Փաշինյանը դեռ 2024 թվականի փետրվարին հայտարարել էր ՀԱՊԿ-ում Հայաստանի անդամակցության գործնական սառեցման մասին։ Այդ շրջանից ի վեր Հայաստանը չի մասնակցում կազմակերպության միջոցառումներին և դադարեցրել է անդամավճարի վճարումը։