Թրամփի վարչակազմը մտահոգված է Սիրիայի վրա Իսրայելի շարունակական ռազմական հարվածներով, քանի որ նման գործողությունները կարող են խաթարել երկիրը կայունացնելու և հրեական պետության հետ հարաբերությունները կարգավորելու ամերիկյան բոլոր ջանքերը: Այս մասին հայտնել է Axios-ը՝ հղում անելով Սպիտակ տան պաշտոնյաներին:
«Մենք փորձում ենք համոզել Բիբիին (Իսրայելի վարչապետ Բենյամին Նեթանյահուին, խմբ.), որ նա պետք է դադարեցնի սա: Որովհետև եթե սա շարունակվի, կկրակի իր ոտքին՝ կկորցնի հսկայական դիվանագիտական հնարավորություն և Սիրիայի նոր կառավարությունը կվերածի թշնամու»,-լրատվամիջոցին ասել է աղբյուրներից մեկը:
Ամերիկացիները հույս ունեն, որ Իսրայելը և Սիրիան կկարողանան հասնել անվտանգության համաձայնագրի, որը, ի վերջո, հիմք կդնի Արաբական Հանրապետության՝ Աբրահամյան համաձայնագրերին միանալուն:
Նշենք,որ նոյեմբերի 28-ին Իսրայելի բանակը ավիահարվածներ էր հասցրել սիրիական Բեյթ Ջան գյուղին և հրետանային կրակ բացել։ Հաղորդվել էր, որ իսրայելական ռազմական պարեկախումբը ներխուժել էր տարածք, ինչը հանգեցրել էր տեղի բնակչության հետ բախումների։ Ըստ «Սիրիա» հեռուստաընկերության՝ հարվածների հետևանքով զոհվել է ավելի քան 20 մարդ։ Իսրայելի բանակը, իր հերթին, նշել էր, որ պատասխան գործողություն է իրականացրել, քանի որ իր ստորաբաժանումը նախկինում հարձակման էր ենթարկվել պաղեստինյան «Համաս» շարժմանը կապված խմբի կողմից։
Հետևեք մեզ տելեգրամում
