Իրանի ազգային անվտանգության գերագույն խորհրդի քարտուղար Ալի Լարիջանին ընդունել է ՌԴ փոխվարչապետ, Հյուսիս-Հարավ միջանցքի հարցով ՌԴ նախագահի հատուկ ներկայացուցիչ Վիտալի Սավելևին, հայտնում են իրանական ԶԼՄ-ները։
Կողմերը քննարկել են Հյուսիս-Հարավ միջանցքի զարգացման, մասնավորապես՝ Ռաշտ-Աստարա երկաթուղու կառուցման հարցը։ Լարիջանին ընդգծել է, որ կարճ ժամանակահատվածում կվերացվեն այդ ուղղությամբ առկա բոլոր խնդիրները։ «Դոկտոր Փեզեշքիանի շարունակական հետևողականության շնորհիվ այս միջանցքի երկայնքով գտնվող բոլոր հողերը մինչև տարեվերջ կանցնեն կառավարության սեփականությանը, որպեսզի նախագիծը կարողանա շարունակվել առանց ընդհատումների»,-ասել է Լարիջանին։
Սավելևն իր հերթին ողջունել է իրանական կողմի մոտեցումը և ընդգծել, որ ՌԴ-ն պատրաստ է արագացնել նախագիծը և մեկնարկել գործնական փուլը։ Կողմերը շեշտել են, որ Հյուսիս-Հարավ միջանցքը կայուն համագործակցությունը ամրապնդելու և տարածաշրջանային կապի անկախ երթուղիներ ստեղծելու Իրանի և Ռուսաստանի համատեղ ռազմավարության մի մասն է։
Նշենք, որ վերջին տարիներին Իրանն ու ՌԴ-ն բանակցում են ռուսական ֆինանսավորմամբ Ռաշտ-Աստարա երկաթուղին կառուցելու շուրջ։ Երկաթուղին Հյուսիս-Հարավ միջանցքի արևմտյան՝ Ադրբեջանով անցնող ճյուղի մաս է կազմում։
Հետևեք մեզ տելեգրամում
