Վրաստանում քննարկում են օտարերկրյա զբոսաշրջիկների պարտադիր ապահովագրության մոդելը

2026 թվականի հունվարի 1-ից Վրաստան մուտք գործող օտարերկրյա քաղաքացիների համար նախատեսվում է պարտադիր ապահովագրության ներդրում։ Ըստ վրացական մեդիայի և ոլորտի ներկայացուցիչների, այս պահանջը ամրագրված է «Զբոսաշրջության մասին» օրենքում, սակայն ապահովագրության սխեման և պայմանները դեռ պետք է սահմանվեն կառավարության առանձին որոշմամբ։

Վրաստանի ապահովագրական ոլորտում քննարկվում են երկու հիմնական տարբերակ։ Առաջին դեպքում կառավարությունը չի հստակեցնի, թե որ ընկերությունները պետք է ապահովագրեն ներգնա զբոսաշրջիկներին, և սահմանին միայն կստուգվի ապահովագրության առկայությունը։ Այս սցենարի դեպքում առավել մեծ օգուտ կարող են ստանալ հարևան երկրների ապահովագրական ընկերությունները, որտեղից գալիս է զբոսաշրջիկների հիմնական հոսքը։ Երկրորդ, ոլորտի համար նախընտրելի տարբերակի համաձայն, ինչպես ոչ ռեզիդենտ ավտոմեքենաների սեփականատերերի դեպքում այցելուները կապահովագրվեն վրացական ապահովագրական ընկերությունների կողմից։ Այս դեպքում, ենթադրվում է, որ ոլորտի շրջանառությունը կաճի լրացուցիչ 100 միլիոն լարիով։

Վրաստանի ապահովագրական ասոցիացիայի խորհրդի ղեկավար Դևի Խեչինաշվիլին հայտնել է, որ հույս ունեն՝ կառավարությունը կընտրի երկրորդ տարբերակը՝ ընդգծելով, որ դա առավել արդյունավետ կլինի թե՛ երկրի բժշկական համակարգի, թե՛ զբոսաշրջիկների սպասարկման որակի համար։