Ադրբեջանի իշխանությունները խեղդում են մամուլը և խոսքի ազատությունը: Այս մասին կարծիք է հայտնել աշխարհում խոսքի և արտահայտման ազատության պաշտպանությամբ զբաղվող «Լրագրողներ առանց սահմանների» կազմակերպության (RSF) Արևելյան Եվրոպայի և Կենտրոնական Ասիայի բյուրոյի ղեկավար Ժաննա Կավելյեն:
Կավելյեն «Ամերիկայի Ձայնին» տված հարցազրույցում ասել է, որ Ադրբեջանը 2020 թվականին 180 երկրների շարքում զբաղեցրել է 168-րդ տեղը՝ անցյալ տարվա համեմատ նահանջելով երկու հորիզոնականով։
Նրա խոսքով՝ Ադրբեջանի փոխվարչապետ Ալի Հասանովի պաշտոնանկությունից հետո փոփոխության հույս կար, սակայն լրագրողների և մամուլին պաշտպանելու խոստումները չիրականացան։
Կավելյեն հայտնել է, որ անկախ լրագրողները, բլոգերները և նույնիսկ նրանք, որոնք ապրում են Ադրբեջանից դուրս շանտաժի են ենթարկվում և ձերբակալվում են անհիմն մեղադրանքներով։ Նա հավելել է, որ կազմակերպությունը շատ անհանգստացած է Ադրբեջանում ստեղծված իրավիճակով։
Նա նշել է, որ Ադրբեջանում կորոնավիրուսի կարանտինից հետո ուժեղացել է գրաքննությունը և երկրի իշխանությունները կարանտինային իրավիճակն օգտագործում են բռնաճնշումների համար:
«Մենք համոզված ենք, որ մարտի 17-ին «Տեղեկատվության և դրա պաշտպանության» մասին օրենքում կատարված փոփոխությունները շատ վտանգավոր են մամուլի ազատության համար: Պաշտոնյաները կարող են մեղադրել առցանց լրատվամիջոցների սեփականատերերին ոչ ճիշտ տեղեկատվություն հրապարակելու մեջ և պատժել նրանց: Լրագրողները ստիպված են համաճարակի վերաբերյալ օգտագործել միայն պաշտոնական տեղեկատվությունը: Նույնիսկ սոցցանցերի օգատերերը չեն կարող հրապարակել ոչ պաշտոնական տեղեկատվություն: Սա մեզ շատ է անհանգստացնում », -ասել է Կավելյեն:
Նրա խոսքով՝ միջազգային հանրությունը պետք է ճնշում գործադրի Բաքվի վրա, հատկապես ՝ այն եվրոպական երկրները, որոնք առևտրով են զբաղվում Ադրբեջանի հետ:
Հետևեք մեզ տելեգրամում
