Իրանում շարունակում է գործել ինտերնետի համատարած սահմանափակումը, որը արդեն տեւում է ավելի քան 12 ժամ։ Կապի հասանելիությունը նվազել է սովորական մակարդակից շուրջ 1 տոկոսի, ինչի արդյունքում երկիրը փաստացի զրկված է համացանցից։
Անհասանելի են բոլոր լրատվական կայքերը։ Տելեգրամյան ալիքներում և այլ սոցիալական հարթակներում տեղեկատվությունը չի թարմացվում ինտերնետային կապի բացակայության պատճառով։
Նշենք, որ բողոքները, որոնք առաջացել էին երկրում խորացող տնտեսական խնդիրների ֆոնին, վերջին օրերին արագորեն տարածվել են մի շարք նահանգներում։ Նախորդ գիշերվա ցույցերը, ըստ աղբյուրների, եղել են մինչև այժմ ամենամարդաշատը։
Միջազգային վերլուծաբանների գնահատմամբ՝ իշխանությունները համացանցի խափանումների միջոցով փորձում են կանխել ցույցերի կազմակերպումը, ինչպես նաեւ սահմանափակել տեղեկատվության տարածումը երկրում տիրող զարգացումների վերաբերյալ։
Այսպիսով, այս պահի դրությամբ գրեթե անհնար է հետևել Իրանի ներսում ընթացող զարգացումներին, քանի որ լրատվամիջոցների կայքերը չեն գործում, իսկ տեղեկատվական հոսքերը փաստացի դադարել են։
Հետևեք մեզ տելեգրամում
