Իրանի ազգային անվտանգության գերագույն խորհուրդը հայտարարություն է տարածել երկրում շարունակվող բողոքի ցույցերի վերաբերյալ՝ այդ ամենի մեջ մեղադրելով Իսրայելին և ԱՄՆ-ին։
«12-օրյա պատերազմից մինչ այսօր սիոնիստական ռեժիմը հիբրիդային պատերազմով շարունակում է իրանցիների դեմ ճնշումները:Երբեմն փոխում է մարտավարությունը, սակայն չի հրաժարվում Իրանի ժողովրդի դեմ պատերազմելու իր ուղեգծից։ Վերջին օրերի այս իրադարձությունները, թեև սկզբնապես սկսվել են շուկայի անկայունության դեմ բողոքներով, սակայն սիոնիստական թշնամու ուղղորդմամբ և նախագծմամբ վերածվել են երկրի անվտանգության դեմ գործողությունների։
Վերջին օրերին Թրամփի հայտարարությունները նույնպես վկայում են այս երկու ռեժիմների համատեղ ծրագրավորման մասին, որոնք Իրանի ժողովրդի կյանքը դարձնում են անապահով։ Իրանի մեծ ժողովուրդը իր ազգային համախմբվածությամբ 12-օրյա պատերազմի ընթացքում ստիպեց թշնամուն ընդունել ռազմավարական պարտությունը, և այսօր էլ, միասնությամբ ու համերաշխությամբ, կձախողի նրանց դիվերսիոն հնարքները։
Ոչ մի արժանապատիվ մարդ թույլ չի տալիս, որ ազգային խորհրդանիշները, ինչպիսին է դրոշը, ենթարկվեն վիրավորանքի, առավել ևս՝ այրվեն։ Ոչ մի պատվախնդիր իրանցի թույլ չի տա, որ ազգային դիմադրության խորհրդանիշի՝ Հաջ Ղասեմ Սոլեյմանիի արձանը ենթարկվի վիրավորանքի, առավել ևս՝ այրվի։ Ոչ մի ազատատենչ իրանցի թույլ չի տա, որ ազգային ինքնության խորհրդանիշների նկատմամբ, ինչպես Աստծո տունը, անհարգալից վերաբերմունք ցուցաբերվի, առավել ևս՝ այն հրկիզվի։ Անկայունությունը որևէ ժողովրդի համար ընդունելի չէ՝ անկախ նրանից, թե որ համակարգից կամ երկրից է:
Ակնհայտ է, որ նրանք, ովքեր տնտեսական պայմանների դեմ բողոք ունեն, չեն կատարի այնպիսի գործողություններ, որոնք տնտեսական վնաս կպատճառեն և կվատթարացնեն իրավիճակը, կամ տնտեսական խնդիրներին կավելացնեն նաև անապահովությունը։ Անվտանգության և իրավապահ ուժերի ներկայությունը միտված է երկրում անապահովության կանխմանը։ Այս ուժերը, Իրանի հպարտ և հաստատակամ ժողովրդի կողքին կանգնած, կչեզոքացնեն սիոնիստական ռեժիմի և նրա կնքահոր՝ ԱՄՆ-ի կողմից մշակված անապահովության սցենարը և կապահովեն ժողովրդի կյանքի համար անվտանգ միջավայր։ Այս ճանապարհին անվտանգության ուժերն ու դատական իշխանությունը որևէ հանդուրժողականություն չեն ցուցաբերի ջարդարարների նկատմամբ»,-ասված է հայտարարության մեջ։
Հետևեք մեզ տելեգրամում
