Վրաստանի վարչապետ Իրակլի Կոբախիձեն անդրադարձել է Դավոսում Հայաստանի և Ադրբեջանի նախագահների հայտարարությանը, թե ինչ-որ մի օր Վրաստանի տարածքով բեռնափոխադրումների փոխարեն կարվեն ուղիղ փոխադրումներ։ Կոբախիձեն հայտարարել է, որ Վրաստանի տարանցիկ գործառույթը սպառնալիքի տակ չէ։
«Մենք, իհարկե, ողջունում ենք մեր հարևանների միջև հարաբերությունների վերականգնումը, այդ թվում՝ առևտրատնտեսական հարաբերությունների զարգացումը։ Ինչ վերաբերում է մեր տարանցիկ գործառույթին, ապա մենք շատ մեծ ներդրումներ ենք կատարում տարանցիկ գործառույթի զարգացման մեջ, սա վերաբերում է ճանապարհային ենթակառուցվածքներին, նավահանգիստներին, օդանավակայաններին, տարբեր տեսակի ենթակառուցվածքային օբյեկտներին։ Սա հիմնված է տարանցիկ աճի վերաբերյալ դրական սպասումների վրա»», -«Իմեդի» հեռուստաընկերության ուղիղ եթերում ասել է Իրակլի Կոբախիձեն։
Կոբախիձեն պնդել է, թե «այլընտրանքային միջանցքը իրական սպառնալիք չի ներկայացնում» և որ ««Միջին միջանցքում» բեռնափոխադրումների ծավալը վերջին հինգ տարիների ընթացքում յոթ անգամ աճել է»։
«Նման պայմաններում մեր միակ խնդիրն է մեր ենթակառուցվածքներով համընթաց քայլել այս աճող բեռնափոխադրմանը։ Աճի նման պայմաններում այլընտրանքային միջանցքը միայն մեր տարանցիկ գործառույթի լրացում կլինի»,-ասել է նա։
Հետևեք մեզ տելեգրամում
