Վարչապետ Նիկոլ Փաշինյանը կառավարության նիստից հետո լրագրողների հետ զրույցում անդրադարձել է Հայաստան-Թուրքիա հարաբերությունների ընթացքին՝ նշելով, որ կարգավորումը շատ կարևոր է, և զարգացումներ կան այդտեղ, և հասունացած է վաղուց, որ իրադարձություններ տեղի ունենան:
«Ես հույս ունեմ, որ այդ իրադարձությունները տեղի կունենան։ Դեռևս 2022 թվականին ձեռք բերված պայմանավորվածությունները առնվազն իրականություն կդառնան։ Մենք հիմա նաև Ախուրիկի հատվածում, Մարգարայի հատվածում գործողություններ ենք անում, որպեսզի հանկարծ հնարավոր որոշումները չխոչընդոտվեն մեր կողմից անպատրաստ լինելու պատճառով։
Ես չեմ կարող կոնկրետ որևէ բան ասել, իհարկե, չթաքցնեմ՝ դիվանագիտական խողովակներով աշխատանքն արվում է, որոշակի ազդակներ մենք ստանում ենք: Տեսնում ենք՝ որոշակի դրական ազդակներ կան Թուրքիայից, բայց տեսնենք»,- ասել է Փաշինյանը։
Վարչապետը հիշեցրել է, որ Մարգարայի անցակետը տեխնիկապես պատրաստ է, սակայն սահմանը բացվելուց հետո անհրաժեշտ կլինի նաև ենթակառուցվածքների ընդլայնում։
«Բայց պետք է իմանանք, որ սահմանը բացվելուց հետո այդ կամուրջը, որը կա, բավարար չի լինելու, և պետք է մտածել նոր կամրջի, կամուրջների կառուցման մասին, ընդ որում և՛ Մարգարայում, և՛ Ախուրիկում, Շիրակի մարզում և Արմավիրի մարզում, բայց դա արդեն հետագայի խնդիր է»,-հավելել է նա:
Փաշինյանն առանձնացրել է նաև Անիի պատմական կամրջի վերականգնման մասին պայմանավորվածությունը՝ նշելով, որ դրա շուրջ քննարկումները շարունակվում են։
«Բնականաբար, այդ թեման ավելի կկոնկրետացվի, երբ որ սահմանը բացվի և օգտագործվի, չնայած՝ մենք այսօր պայմանավորվածություն ունենք Անիի հատվածի պատմական կամրջի վերականգնման մասին։ Այդ ուղղությամբ քննարկումներ են գնում, և հնարավոր է նույնիսկ առաջիկայում արդեն գործնական հատվածը սկսvի, որը խորհրդանշական նշանակություն ունի», – ասել է վարչապետը։
Հետևեք մեզ տելեգրամում
