Bitcoin-ը հինգշաբթի շարունակել է նվազել՝ մոտենալով առանցքային 70 հզ դոլարի։ Reuters-ի տվյալներով՝ եվրոպական առավոտյան սեանսում աշխարհի խոշորագույն կրիպտոարժույթը նվազել է մոտ 2 տոկոսով, իսկ ասիական առևտրի ընթացքում անկումը հասել է մինչև 3.5 տոկոսի՝ գինը իջեցնելով մինչև 70 052 դոլար։ Սա Bitcoin-ի ամենացածր մակարդակն է 2024 թվականի նոյեմբերից ի վեր։
Նվազման ֆոնին Ether-ը նույնպես կորուստներ է գրանցել՝ էժանանալով շուրջ 0,7 տոկոսով և հասնելով 2 111 դոլարի։ Վերլուծաբանների գնահատմամբ՝ 2 հազար դոլարից իջնելը Ether-ի համար կլինի առաջին նման դեպքն անցած տարվա մայիսից հետո։ Ընդհանուր առմամբ Bitcoin-ը շաբաթվա ընթացքում կորցրել է ավելի քան 7 տոկոս, իսկ տարվա սկզբից՝ գրեթե 20 տոկոս, մինչդեռ Ether-ի տարեկան անկումը մոտենում է 30 տոկոսի։
Վերլուծաբանները վերջին անկումը կապում են ԱՄՆ Դաշնային պահուստային համակարգի ղեկավարի պաշտոնում Քևին Ուորշի առաջադրման հետ, քանի որ շուկաները սպասում են ավելի խիստ դրամավարկային քաղաքականության և Ֆեդի հաշվեկշռի կրճատման։ Deutsche Bank-ի գնահատմամբ՝ կրիպտոշուկայում շարունակվող անկումը պայմանավորված է նաև ինստիտուցիոնալ ETF-ներից զանգվածային ելքերով․ միայն հունվարին ԱՄՆ spot Bitcoin ETF-ներից դուրս է եկել ավելի քան 3 միլիարդ դոլար, ինչը վկայում է թվային ակտիվների նկատմամբ ներդրողների աճող զգուշավորության մասին։
Հետևեք մեզ տելեգրամում
