ԱՄՆ նախագահ Դոնալդ Թրամփը նախազգուշացրել է Թեհրանին, որ Միացյալ Նահանգները պատրաստ է «ամբողջությամբ պայթեցնել «Հարավային Փարս» գազի հանքավայրը», եթե Իրանը շարունակի թիրախավորել Կատարի էներգետիկ ենթակառուցվածքները։
Տարածաշրջանում իրավիճակը կտրուկ սրվել է այն բանից հետո, երբ Իսրայելը հարվածներ հասցրեց Իրանում գտնվող «Հարավային Փարս» գազի հանքավայրին։ Ի պատասխան՝ Թեհրանը բալիստիկ հրթիռներով թիրախավորեց Կատարի «Ռաս Լաֆան» արդյունաբերական քաղաքը, որտեղ գտնվում է աշխարհի խոշորագույն հեղուկացված բնական գազի արտահանման կայանը։
«QatarEnergy» ընկերությունը հաստատել է, որ հարձակման հետևանքով պատճառվել է «զգալի վնաս», իսկ հինգշաբթի վաղ առավոտյան հրթիռակոծության նոր ալիքը հանգեցրել է լայնամասշտաբ հրդեհների գազային մի քանի օբյեկտներում:
Սոցիալական ցանցի իր էջում կատարած գրառման մեջ Թրամփը հերքել է այն տեղեկությունները, թե Իսրայելի հարձակումը համակարգված է եղել Վաշինգտոնի հետ. «Միացյալ Նահանգները ոչինչ չգիտեր այս կոնկրետ հարձակման մասին, իսկ Կատարը որևէ ձևով ներգրավված չէր դրանում և գաղափար անգամ չուներ, որ դա տեղի կունենա»,-նշել է Սպիտակ տան ղեկավարը: Թրամփը նաև հայտարարել է, որ Իսրայելը կդադարեցնի հարվածները «Հարավային Փարս»-ին, եթե Իրանը «անխոհեմաբար» չորոշի կրկին հարվածել Կատարին։
Հետևեք մեզ տելեգրամում
