Թուրքական «Açık» ռադիոյի հեռարձակման լիցենզիայի չեղարկման վերաբերյալ իրավական գործընթացը տեղափոխվել է Թուրքիայի Պետական խորհուրդ։
Լրատվամիջոցի գործունեությունը կասեցվել էր այն բանից հետո, երբ 2024 թ․ ապրիլի 24-ին ուղիղ եթերի ընթացքում հյուրերից մեկը օգտագործել էր «Հայոց ցեղասպանության ոգեկոչում» և «որպես ցեղասպանություն որակվող» արտահայտությունները։ Հիմք ընդունելով այս արտահայտությունները՝ Թուրքիայի Ռադիոյի և հեռուստատեսության գերագույն խորհուրդը սահմանել էր առավելագույն չափի վարչական տուգանք և հեռարձակման կասեցում՝ 5 անգամ, որից հետո էլ որոշում էր կայացվել չեղարկել ռադիոյի հեռարձակման լիցենզիան։ Ներկայումս առաջին ատյանի և վերաքննիչ դատարանները մերժել են ռադիոյի հայցերը, և գործը տեղափոխվել է Պետական խորհուրդ։
Ռադիոյի աշխատակազմի և վերջինիս իրավաբանական թիմի կողմից հրավիրված մամուլի ասուլիսի ընթացքում շեշտվել է, որ այս գործընթացը ոչ միայն վարչական գործողություն է մեկ ռադիոկայանի դեմ, այլև կրիտիկական է օրենքի գերակայության, մամուլի ազատության և խոսքի ազատության տեսանկյունից։ Նշվել է, որ տեղի ունեցող գործընթացը միայն «Açık» ռադիոյին չի վերաբերում, այլ կառուցվածքային խնդիր է, որը հուզում է Թուրքիայի բոլոր անկախ լրատվամիջոցներին։
Մամուլի հայտարարության մեջ նշվել է, որ այնպիսի արտահայտությունների համար, որոնք ներպետական և միջազգային դատական որոշումներով համարվում են խոսքի ազատություն, խիստ պատժամիջոցների կիրառումը մեդիայի վրա ստեղծում է զսպող և սահմանափակող ազդեցություն։
Հետևեք մեզ տելեգրամում
