ՌԴ նախագահի մամուլի քարտուղար Դմիտրի Պեսկովը հայտարարել է, որ Հայաստանի համար անհնար է միաժամանակ անդամակցել Եվրասիական տնտեսական միությանը (ԵԱՏՄ) և Եվրամիությանը (ԵՄ)։ Այս մասին հայտնում է ռուսաստանյան Ria Novosti լրատվական գործակալությունը:
Պեսկովի խոսքով՝ սա պայմանավորված է «ինտեգրացիոն համակարգերի անհամատեղելիությամբ»: «ԵԱՏՄ-ի և ԵՄ-ի օպերացիոն համակարգերը տարբեր են և չեն կարող միասին աշխատել: Ինչ-որ պահի պետք է ընտրություն կատարել»,-նշել է պաշտոնյան։
Ավելի վաղ՝ ապրիլի 1-ին ՌԴ նախագահ Վլադիմիր Պուտինը ՀՀ վարչապետ Նիկոլ Փաշինյանի հանդիպման ժամանակ նշել էր, որ Մոսկվան Եվրամիության հետ ՀՀ հարաբերությունների զարգացմանը վերաբերում է «լիովին հանգիստ»։ Պուտինը նաև շեշտել էր, որ Եվրամիության հետ մաքսային միությունում լինելը և միաժամանակ ԵԱՏՄ-ում գտնվելն անհնար է։ Ի պատասխան՝ ՀՀ վարչապետ Նիկոլ Փաշինյանը նույնպես ընդունել էր երկու միավորումներին անդամակցելու սկզբունքային անհամատեղելիությունը՝ նշելով, որ այս պահին Հայաստանի ունեցած օրակարգերը դեռևս համատեղելի են։ Նա հավելել է, որ Երևանը կշարունակի այդ ուղղությամբ աշխատել այնքան ժամանակ, քանի դեռ կա հնարավորություն, իսկ վերջնական ընտրության անհրաժեշտության դեպքում որոշումը կկայացնեն Հայաստանի քաղաքացիները։
Հետևեք մեզ տելեգրամում
