Թուրքիայում մշակված նոր օրենսդրական նախաձեռնությամբ նախատեսվել է մինչև 2040 թվականը սահմանափակել ծխախոտի արտադրությունը, վաճառքն ու օգտագործումը, իսկ 2040 թվականին՝ ամբողջությամբ արգելել։ Այս մասին հայտնել են թուրքական ԶԼՄ-ները:
Դեռևս մշակման փուլում գտնվող 41 կետից բաղկացած օրինագծի համաձայն՝ ծխախոտային արտադրանքի օգտագործումը կարգելվի հանրային տարածքներում, պետական հաստատություններում, կրթական և առողջապահական կազմակերպություններում, երեխաների համար նախատեսված վայրերում, հանրային սննդի կետերում, ինչպես նաև բացօթյա միջոցառումների ժամանակ․ ծխել կթույլատրվի միայն հատուկ նախատեսված տարածքներում։
Նախագծով առաջարկվել է նաև փոխել վաճառքի կարգը։ Ծխախոտային արտադրանքը պետք է պահվի փակ պահարաններում՝ գնորդներին անհասանելի և անտեսանելի վայրում։ Վաճառքը կիրականացվի միայն էլեկտրոնային համակարգերի միջոցով՝ պարտադիր տարիքային նույնականացմամբ։
Միաժամանակ ընդլայնվել է «ծխախոտային արտադրանք» հասկացությունը՝ ներառելով նաև էլեկտրոնային ծխախոտները, տաքացվող ծխախոտային համակարգերը և նիկոտին պարունակող այլ սարքեր։
Օրենքի նախագծով նախատեսվել է, որ 2040 թվականից հետո ծխախոտային արտադրանքի արտադրությունն ու վաճառքը լիովին կդադարեցվեն։ Նշված ժամկետից հետո խախտումների համար կկիրառվեն խոշոր տուգանքներ արտադրողների և վաճառողների, վարչական տույժեր՝ սպառողների նկատմամբ։
Հետևեք մեզ տելեգրամում
