Սեպտեմբերի 6-ին Վանա լճի Աղթամար կղզու Սուրբ Խաչ հայկական եկեղեցում մատուցվել է 14-րդ ամենամյա պատարագը։ Պատարագը մատուցել են Կ. Պոլսի հայոց պատրիարք Սահակ Մաշալյանը և ԱՄՆ Արևելյան շրջանի Հայոց եկեղեցու հոգևոր առաջնորդ, եպիսկոպոս Մեսրոպ Պարսամյանը։
Մաշալյանը նշել է, որ պատարագի ընթացքում աղոթել են աշխարհի խաղաղության, մարդկության եղբայրության, ինչպես նաև Հայաստանի և Թուրքիայի միջև հարաբերությունների կարգավորման համար։
«Այս տարի, փառք Աստծո, մենք շատ ուխտավորներ ունեցանք։ Նրանք եկել էին աշխարհի տարբեր ծայրերից՝ ԱՄՆ-ից, Եվրոպայից, Հայաստանից, Իրանից։ Այս հետաքրքրությունը մեզ ուրախացնում է», – ասել է պատրիարքը։ Նա շնորհակալություն է հայտնել Թուրքիայի մշակույթի և զբոսաշրջության նախարար Մեհմեթ Նուրի Էրսոյին և Վանի նահանգապետ Օզան Բալչըին՝ միջոցառման կազմակերպմանն աջակցելու համար։
Մաշալյանի խոսքով՝ «Թուրքիայի և Հայաստանի միջև հարաբերությունների կարգավորումն ու ժողովուրդների եղբայրությունը այս երկրում ապրողների անկեղծ ցանկությունն են»։
«Թուրքիայի և Հայաստանի հարաբերությունների կարգավորումը հատուկ տեղ գտավ մեր աղոթքներում, որովհետև այս հողերում ապրող մարդիկ արժանի են խաղաղության», – ասել է նա։
Հետևեք մեզ տելեգրամում
