Իրանում պատերազմը ճնշում է ավիավառելիքի շուկան․ ավիաընկերությունները դիմել են ԵՄ-ին

Ապրիլի 14-ին եվրոպական խոշորագույն ավիաընկերությունները (Lufthansa, Air France-KLM, easyJet) դիմել են Եվրամիությանը՝ խնդրելով ճգնաժամային արտակարգ միջոցառումներ ձեռնարկել, քանի որ Իրանի շուրջ ռազմական հակամարտությունը արդեն խնդիրներ է ստեղծում ավիացիոն ոլորտում և խանգարում է թռիչքների բնականոն աշխատանքին։

Ավիաընկերությունների ասոցիացիան՝ Airlines for Europe (A4E), ԵՄ-ին ներկայացրած փաստաթղթում առաջարկել է մի շարք արտակարգ միջոցառումներ՝ այդ թվում ավիավառելիքի մատակարարումների համաեվրոպական վերահսկողություն, ավիացիոն ոլորտի համար ԵՄ ածխածնային շուկայի ժամանակավոր կասեցում և որոշ հարկերի վերացում։

Ըստ ոլորտային կազմակերպությունների՝ հակամարտության հետևանքով օդային տարածքների փակումը և տարածաշրջանային սահմանափակումները լուրջ ճնշում են ստեղծել ավիափոխադրումների վրա։ Բացի այդ, ավիաընկերությունները զգուշացնում են ավիավառելիքի հնարավոր պակասի մասին՝ նշելով, որ Հորմուզի նեղուցի փակումը կարող է խորացնել էներգետիկ ճգնաժամը Եվրոպայում։ Նախազգուշացվում է նաև, որ առաջիկա շաբաթների ընթացքում Եվրոպան կարող է բախվել ավիավառելիքի դեֆիցիտի։

Ավիաընկերությունները ԵՄ-ին առաջարկում են նաև կերոսինի համատեղ գնումների մեխանիզմ քննարկել, ինչպես դա արվել է բնական գազի դեպքում՝ Ռուսաստանի մատակարարումների կրճատումից հետո 2022 թվականին։

Եվրոպական հանձնաժողովը հայտարարել է, որ պատրաստում է նոր միջոցառումների փաթեթ՝ էներգետիկ շուկաների վրա պատերազմի ազդեցությունը մեղմելու նպատակով, սակայն դեռ չի հստակեցրել՝ արդյոք այն կներառի նաև ավիավառելիքի վերաբերյալ հատուկ լուծումներ։