Վրաստանի պետական անվտանգության ծառայությունը հայտնել է «Իսլամական պետություն» ահաբեկչական խմբավորման հետ կապեր ունենալու մեղադրանքով երկու անձի ձերբակալության մասին։ Հակաահաբեկչական կենտրոնի և Հատուկ գործողությունների դեպարտամենտի համատեղ միջոցառումներն իրականացվել են Գարդաբանիի և Աջարիայի տարածաշրջանում։ Ձերբակալվածներից մեկը Վրաստանի քաղաքացի է, իսկ մյուսը՝ օտարերկրյա պետության քաղաքացի։
Պետական անվտանգության ծառայության փոխնախագահ Լաշա Մագրատձեի փոխանցմամբ՝ նշված անձինք նախապես գտնվել են ուժայինների ուշադրության կենտրոնում, և նրանց մուտքը երկիր, ինչպես նաև ժամանման նպատակները եղել են վերահսկողության տակ։ Կասկածյալները Վրաստան են մուտք գործել առանձին-առանձին և բնակություն հաստատել վարձակալած բնակարանում, որտեղ նրանց տեղաշարժն ու գործողությունները մշտադիտարկման են ենթարկվել։
Քննությամբ պարզվել է, որ ձերբակալվածներն արդեն իսկ անդամագրված են եղել «Իսլամական պետությանը» և հավատարմության երդում են տվել կազմակերպության առաջնորդներին։ Համապատասխան տեսագրությունն ուղարկվել է խմբավորման ղեկավարությանը՝ որպես անվերապահ հնազանդության և ցանկացած հանձնարարություն կատարելու պատրաստակամության ապացույց։ Ըստ իրավապահների տվյալների՝ նրանք նախատեսում էին Վրաստանից մեկնել այլ երկիր՝ ահաբեկչական խմբավորման շարքերը համալրելու նպատակով։
Հետևեք մեզ տելեգրամում
