Վրաստանի խորհրդարանի խոսնակ Շալվա Պապուաշվիլին քննադատել է ԵՄ-ին՝ Ռուսաստանի դեմ պատժամիջոցներին միանալու կոչերի համար: Նա ընդգծել է, որ ՌԴ հարցում ԵՄ քաղաքականությանը հետևելը Վրաստանի համար «աղետալի» կլինի: Փոխանցում է Imedi լրատվական գործակալությունը:
Պապուաշվիլին նշել է, որ Բրյուսելի կողմից ճնշումներն ավելի հրապարակային են դառնում, մինչդեռ նախկինում նմանատիպ ուղերձները հաղորդվում էին ավելի զուսպ և մասնավոր ձևաչափերով։ Ըստ նրա՝ այս փոփոխությունն այժմ ավելի հստակ է դարձնում, թե իրականում ուր է Բրյուսելը փորձում տանել երկիրը, և եթե Վրաստանի եվրոպական հեռանկարը պայմանավորված է արտաքին քաղաքական որոշումների փոփոխությամբ, ապա դա վտանգավոր նախադրյալ է։
Խորհրդարանի խոսնակի պնդմամբ՝ Վրաստանի և Եվրոպական միության միջև հիմնական անհամաձայնությունը վերաբերում է հենց պատժամիջոցների քաղաքականությանը։ Նա պարզաբանել է, որ Բրյուսելն ակնկալում է ոչ միայն այն, որ Վրաստանը կանխի իր տարածքով պատժամիջոցների շրջանցումը, այլև սահմանի սեփական երկկողմ պատժամիջոցներ Ռուսաստանի դեմ։ Պապուաշվիլին ընդգծել է, որ ԵՄ քաղաքականությանը լիակատար համապատասխանեցումը ենթադրում է նաև վիզային ռեժիմի ներդրում և առևտրային սահմանափակումներ, ինչը հակասում է Վրաստանի որդեգրած «ռազմավարական համբերության» քաղաքականությանը, որին երկիրը ստիպված է հետևել 2008 թվականից ի վեր։
Պապուաշվիլին հռետորական հարց է բարձրացրել առ այն, թե արդյոք Եվրոպական միությունը պատրաստ է ստանձնել հնարավոր տնտեսական կամ ռազմական հետևանքների պատասխանատվությունը։ Նա նշել է, որ պատժամիջոցների կիրառման դեպքում հնարավոր տնտեսական ճգնաժամի կամ Ռուսաստանի հետ ուղիղ ռազմական բախման պարագայում Բրյուսելը որևէ ֆինանսական օգնության կամ ռազմական աջակցության երաշխիք չի տալիս։ Եզրափակելով իր խոսքը՝ խորհրդարանի խոսնակը հայտարարել է, որ Բրյուսելի պահանջները Վրաստանին մղում են դեպի Ռուսաստանի հետ էսկալացիայի, ինչը վերջնարդյունքում կարող է նշանակել պատերազմ, որտեղ Վրաստանը ստիպված կլինի պայքարել միայնակ։
Հիշեցնենք, որ ավելի վաղ ՌԴ ԱԳՆ խոսնակը զգուշացրել էր, որ ԵՄ-ին անդամակցելու դեպքում Մոսկվան պատժամիջոցներ կկիրառի Վրաստանի նկատմամբ:
Հետևեք մեզ տելեգրամում
