Իրանի իշխանությունները պահանջել են ԱՄՆ-ից անհապաղ ազատ արձակել առգրավված իրանական «Touska» բեռնատար նավը և անձնակազմին։ Այս մասին հայտնել է «CNN World»-ը։
Իրանի ԱԳՆ-ն տեղի ունեցածը բնութագրել է որպես «ծայրահեղ վտանգավոր և հանցավոր գործողություն»՝ նշելով, որ նավի բեռը արժեցել է միլիոնավոր դոլարներ, սակայն դրա բնույթի մասին մանրամասներ չեն ներկայացվել։
Թեհրանը նաև զգուշացրել է, որ պատրաստ է պատասխան քայլերի՝ պաշտպանելու իր ազգային շահերն ու անվտանգությունը։ «Կասկած չկա, որ Իրանի Իսլամական Հանրապետությունը կօգտագործի իր բոլոր հնարավորությունները՝ պաշտպանելու քաղաքացիների իրավունքներն ու արժանապատվությունը», – ասվել է հայտարարության մեջ։
Իրանական կողմը հավելել է, որ տարածաշրջանում հնարավոր հետագա լարվածության ամբողջ պատասխանատվությունը կրելու է ԱՄՆ-ն։
Հիշեցնենք, որ ԱՄՆ ռազմածովային ուժերը ապրիլի 19-ին կրակ էին բացել Իրանի դրոշով երթևեկող նավի վրա և այն առգրավել այն բանից հետո, երբ նավը փորձել էր անցնել Օմանի ծոցում հաստատված ամերիկյան ծովային շրջափակումը։ ԱՄՆ Կենտրոնական հրամանատարության տարածած տեսանյութում երևում էր, թե ինչպես է կառավարվող հրթիռը կրակ արձակում նավի ուղղությամբ, իսկ ծովային հետևակայինները ուղղաթիռներից իջնում են դրա տախտակամած։ Դեռևս հայտնի չէ, թե քանի մարդ է եղել նավում և ինչ ազգության են նրանք։
Հետևեք մեզ տելեգրամում
