Թուրքիայի արտաքին գործերի նախարար Հաքան Ֆիդանը Անթալիայի դիվանագիտական ֆորումի ընթացքում հայտարարել է, որ Հայաստան-Ադրբեջան խաղաղության գործընթացի արդյունքները կունենան լուրջ դրական ազդեցություն ամբողջ տարածաշրջանի վրա։
«Հուսով ենք, որ այս համաձայնագիրը կյանքի կկոչվի։ Մենք արդեն հիմա տեսնում ենք, որ հակամարտության բացակայության պայմաններում խաղաղության առկայությունը և դրա բերած օգուտներն արդեն ազդեցություն ունեն տարածաշրջանի վրա»,- ասել է Ֆիդանը։
Նա ընդգծել է, որ Թուրքիա-Հայաստան և Ադրբեջան-Հայաստան հարաբերությունների կարգավորումը «շատ լուրջ արդյունքներ կունենա» կապի, տնտեսության, առևտրի և էներգետիկ անվտանգության ոլորտներում։
Նշենք, որ նույն օրերին Ստամբուլում հայկական մամուլի ներկայացուցիչների հետ հանդիպման ժամանակ Հայաստանի Ազգային ժողովի նախագահ Ալեն Սիմոնյանը, անդրադառնալով Հայաստան-Թուրքիա ցամաքային սահմանի փակ մնալու պատճառներին և Ադրբեջանի դերին գործընթացում, ասել է․
«Ադրբեջանն իր լոբբինգի և ազդեցության միջոցով այս պահին խոչընդոտում է գործընթացին. մի կողմից մեզ հետ բանակցում է, մյուս կողմից թույլ չի տալիս, որ Թուրքիան մեզ հետ բանակցի»։
ՀՀ ԱԺ նախագահի գնահատմամբ՝ Թուրքիան «դարձել է այս հարաբերությունների գերին»՝ արձանագրելով, որ իրավիճակն «տարօրինակ» բնույթ է կրում։
Հետևեք մեզ տելեգրամում
