Ղազախստանը և Թուրքիան ստորագրել են «ANKA» անօդաչու թռչող սարքերի արտադրության համատեղ ձեռնարկություն ստեղծելու մասին համաձայնագիր: Թուրքական ԶԼՄ-ների փոխանցմամբ՝ փաստաթուղթը ստորագրվել է Ղազախստանի նախագահ Կասիմ-Ժոմարտ Տոկաևի և Թուրքիայի նախագահ Ռեջեփ Թայիփ Էրդողանի մասնակցությամբ։ Համաձայնագիրը ստորագրվել է Էրդողանի՝ Աստանա կատարած այցի շրջանակներում։
Համաձայնագիրը ստորագրվել է Թուրքիայի ռազմարդյունաբերության վարչության նախագահ Հալուք Գյորգյունի և Ղազախստանի «406 համարի ինքնաթիռների վերանորոգման գործարան» բաժնետիրական ընկերության նախագահ Նուրլան Կուժաևի կողմից։
Ակնկալվում է, որ նախաձեռնությունը կնպաստի Ղազախստանի տեխնիկական և արտադրական կարողությունների զարգացմանը, ինչպես նաև նոր մակարդակի կհասցնի թուրքական պաշտպանական արդյունաբերության համագործակցությունը թյուրքական պետությունների հետ։
Փորձագետների գնահատմամբ՝ Ղազախստանի հետ ստորագրված այս համաձայնագիրը կարող է կարևոր դեր ունենալ տարածաշրջանային ռազմարդյունաբերական համագործակցության խորացման գործում։
Հետևեք մեզ տելեգրամում
