Ռուսաստանի պաշտպանության նախարարությունը մայիսի 19-ի առավոտյան հայտարարել է միջուկային ուժերի կիրառման և պատրաստման լայնածավալ զորավարժությունների մասին, որոնք անցկացվելու են մայիսի 19-ից 21-ը՝ «հավանական ագրեսիայի սպառնալիքի պայմաններում»։
Գերատեսչության հաղորդմամբ՝ զորավարժություններին ներգրավվելու են Ռազմավարական նշանակության հրթիռային զորքերը, Հյուսիսային և Խաղաղօվկիանոսյան նավատորմերը, հեռահար ավիացիայի հրամանատարությունը, ինչպես նաև Լենինգրադի և Կենտրոնական ռազմական շրջանների որոշ ուժեր։ Նախատեսվում է իրականացնել բալիստիկ և թևավոր հրթիռների արձակումներ Ռուսաստանի տարածքում գտնվող զորավարժարանների ուղղությամբ։ Զորավարժությունների նպատակների թվում նշվում է «պոտենցիալ հակառակորդի զսպման միջոցների իրականացումը» և «ագրեսիայի կանխման խնդիրների մշակումը»։
Ռուսական կողմի տվյալներով՝ գործընթացին կարող է ներգրավվել ավելի քան 64 հազար զինծառայող, ավելի քան 200 հրթիռային կայանք, ինչպես նաև ռազմական օդանավեր և նավեր, այդ թվում՝ 8 ռազմավարական նշանակության սուզանավ։ Հաղորդվում է նաև, որ զորավարժությունների ընթացքում կփորձարկվեն Ռուսաստանի և Բելառուսի միջև համաձայնեցված միջուկային ուժերի համատեղ կիրառման հարցերը։
Հետևեք մեզ տելեգրամում
