Հայաստանից վարդերի և բանջարեղենի առաջին խմբաքանակներն արդեն արտահանվում են նոր ուղղություններով: Այս մասին հայտարարել է ՀՀ վարչապետ Նիկոլ Փաշինյանը՝ անդրադառնալով այն հարցին, թե որ երկրների հետ են ձեռք բերվել պայմանավորվածություններ՝ ռուսական շուկայում սահմանափակումների ենթարկված հայկական ապրանքների արտահանման համար։ Փոխանցում է «Արմենպրես»-ը:
Հարցին՝ խոսքը Եվրամիության, թե այլ շուկաների մասին է, վարչապետը պատասխանել է․ «Եվրամիության և այլ»։ Նրա խոսքով՝ արդեն մի քանի գործարար պատվիրակություններ աշխատում են նոր շուկաներում, և հայկական արտադրանքի առաջին խմբաքանակներն արդեն ուղարկվել են։
«Այսօր մեր մի քանի գործարար պատվիրակություններ արդեն աշխատում են, և վարդերի ու բանջարեղենի առաջին խմբաքանակները դուրս են եկել, տեղ կհասնեն, նոր կասեմ, թե որ երկրներ», – նշել է վարչապետը։
Փաշինյանը վստահեցրել է, որ հայկական արտադրանքի իրացման խնդիր չի լինի։ «Եվ ոչ մի ապրանք չի մնալու։ Հիմա արդեն արտահանվում են ուրիշ ուղղություններով», – ասել է նա։
Հիշեցնենք, որ ավելի վաղ Ռուսաստանի «Ռոսսելխոզնադզորը» հայտարարել էր, որ հունիսի 2-ից ժամանակավոր սահմանափակումներ է մտցնում Հայաստանից բալի, կեռասի, ծիրանի, սալորի, դեղձի, նեկտարինի և խաղողի ներմուծման նկատմամբ։ Նախկինում սահմանափակումներ էին կիրառվել նաև մի շարք բանջարեղենների, «Ջերմուկ» հանքային ջրի, ծաղիկների, ձկնամթերքի և որոշ ալկոհոլային խմիչքների նկատմամբ։
Հետևեք մեզ տելեգրամում
