Եվրամիությունը 2.2 միլիոն եվրո է հատկացնում Հայաստանին՝ վիզաների ազատականացման երկխոսությանը աջակցելու նպատակով։ Ծրագիրը մեկնարկել է հունիսի 1-ին և ուղղված է սահմանների կառավարման, փաստաթղթերի անվտանգության և իրավապահ համակարգի բարեփոխումներին։ Այս մասին հայտնել է Ներքին գործերի նախարարությունը՝ ընդգծելով, որ նախաձեռնությունը նպատակ ունի մոտեցնել ՀՀ քաղաքացիներին Եվրոպա առանց վիզայի ճանապարհորդելու հնարավորությանը։
ՆԳ նախարար Արփինե Սարգսյանի խոսքով՝ սա առաջին ծրագիրն է Հայաստանում, որն ուղղակիորեն աջակցում է վիզաների ազատականացման գործընթացին։ Նրա խոսքով՝ ծրագիրը կարևոր քայլ է Հայաստան-ԵՄ համագործակցության խորացման, քաղաքացիների ազատ տեղաշարժի հնարավորությունների ընդլայնման և մարդկային կապերի ամրապնդման ուղղությամբ։ Միջոցառմանը մասնակցել են նաև Հայաստանում ԵՄ պատվիրակության ղեկավար Վասիլիս Մարագոսը, Լիտվայի ՆԳ փոխնախարար Գինտարաս Ալիքսանդրավիչիուսը և Լիտվայի դեսպան Անդրիուս Պուլոկասը։
ԵՄ ներկայացուցիչները բարձր են գնահատել Հայաստանի իրականացրած բարեփոխումները՝ նշելով, որ դրանք արդեն տալիս են տեսանելի արդյունքներ։ Ծրագիրն իրականացվում է Եվրոպական միության ֆինանսավորմամբ՝ Լիտվայի Հանրապետության հետ համագործակցությամբ և ՀՀ ՆԳ նախարարության համակարգմամբ։
Հետևեք մեզ տելեգրամում
