Եվրամիությունը լրացուցիչ աջակցություն կցուցաբերի Հայաստանին՝ Ռուսաստանի կողմից հայկական որոշ ապրանքների ներմուծման արգելքի և սահմանափակումների ֆոնին։ «Արմենպրես»-ի փոխանցմամբ՝ այս մասին հայտնել է Հայաստանում Եվրամիության դեսպան Վասիլիս Մարագոսը:
Հայ արտահանողների հետ հանդիպման ժամանակ նա հայտարարել է, որ հունիսի 4-ին սպասվում են կարևոր հանդիպումներ և հեռախոսազանգեր, որից հետո կհայտարարվի Հայաստանին լրացուցիչ աջակցության միջոցառումների մասին։
«Այսօր ավելի ուշ կարևոր հանդիպումներ կկայանան, հեռախոսազանգեր կլինեն, այդ թվում՝ Եվրահանձնաժողովի նախագահ Ուրսուլա ֆոն դեր Լայենի հետ, որից հետո մենք կհայտարարենք կոնկրետ լրացուցիչ միջոցառումների մասին Հայաստանին աջակցելու վերաբերյալ»,- ասել է Մարագոսը։
Դեսպանը նշել է, որ հայ արտահանողների, տնտեսվարողների հետ հանդիպման նպատակը նրանց գաղափարները լսելն է, թե ինչպես կարող է Եվրամիությունն աջակցել, որպեսզի նրանք կարողանան դիվերսիֆիկացնել արտահանման շուկաները:
Հիշեցնենք, որ վերջին շրջանում ՌԴ-ն սահմանափակել է հայկական մի շարք ապրանքների, այդ թվում՝ ծաղիկների, «Ջերմուկ» հանքային ջրերի, մրգերի, բանջարեղենի ներմուծումը:
Հետևեք մեզ տելեգրամում
