Թուրք բլոգեր Ֆաթիհ Քոփարանն այցելել է Ադրբեջանի վերահսկողության տակ գտնվող Բերձոր (Լաչին), զրուցել Բաքվի իշխանությունների կողմից այնտեղ տեղափոխված բնակիչների հետ: Տարեց մի ադրբեջանցի դժգոհել է տեղում ստեղծված սոցիալ-տնտեսական վիճակից, աշխատատեղերի բացակայությունից: Նա հայտարարել է, որ շատերը պարզապես լքում են Լաչինը և վերադառնում իրենց հին տներ: Այս մասին տեսանյութ են հրապարակել ադրբեջանական ընդդիմադիր ԶԼՄ-ները:
Տեսանյութում տարեց տղամարդը հայտնում է, որ քաղաք տեղափոխված ավելի քան 2000 ադրբեջանցիներ արդեն լքել են այն և վերադարձել իրենց նախկին բնակավայրեր,հիմնականում՝ Բաքու, քանի որ տեղում ապրելու և ընտանիք պահելու նվազագույն պայմաններ չկան։
«Մի 10-15 հոգի ինձ նման ծերեր են մնացել այստեղ։ Եթե չեք հավատում, գնանք դռները թակենք, տեսնենք՝ ով է բացում։ 2000-ից ավելի բնակիչ արդեն հեռացել է: Մարդիկ նորից հետ են դառնում իրենց տեղերը։ Ժողովուրդը լավ թե վատ մի աշխատատեղ, մի տուն-տեղ էր գտել, հացի փող էր վաստակում։ Հիմա աշխատանք չեն տալիս, ժողովրդի երեխեքը մնացել են անգործ։ Աշխատանքից հանել են, խաբել ու մեզ լցրել են այստեղ։ Ոչ ոք հարց չի տալիս պատգամավորին, թե ինչո՞ւ եք այս ժողովրդին փախցնում», – պատմել է բնակիչը։
Հակադարձելով բլոգերի այն դիտարկմանը, թե քաղաքում նոր շինարարություն է ընթանում և հնարավոր է մարդիկ վերադառնան, տարեց տղամարդը նշել է. «Ոչ մի շինարարություն էլ չկա, բոլորը փակել են, վերջացել է։ Այս տները նկարեք, ամեն ինչ կիսատ է մնացել»։
Հետևեք մեզ տելեգրամում
