Իրանի խորհրդարանի պատգամավոր Աբոլֆազլ Զոհրեվանդը հարցազրույցի ընթացքում, անդրադառնալով Ադրբեջանում իսրայելական զորքերի տեղակայման մասին CNN-ի հրապարակմանը, նշել է.
«CNN-ը հայտնել էր, որ Իսրայելի հարձակումների մեծ մասը եղել է Ադրբեջանի կողմից։ Նրանք այնտեղ տեղակայված են: Հիմա Լեռնային Ղարաբաղում թե՛ Թուրքիան է տեղակայել իր ռազմական ուժերը, թե՛ Իսրայելը։ Բաքվի հյուսիսում գտնվող ռազմական օդանավակայանը տվել են նրանց, և ոչ ոք չի կարող դրանից մի քանի կիլոմետր հեռավորության վրա գտնվել։ Նրանք այնտեղ մշտապես զորքեր, տեխնիկա են բերում, աշխատանքներ են անում։ Ու մենք, իհարկե, գիտենք դա, բայց կառավարությունը չի արձագանքում»:
Պատգամավորն ընդգծել է, որ Իրանը պետք է հասկանա, թե ում հետ գործ ունի: «Պետք է ուշադիր լինենք: Մենք գիտեինք, որ Էմիրությունները երկրորդ Իսրայելն է, բայց քանի դեռ չէին հարձակվել, նրանց դեմ ոչինչ չարեցինք, Քուվեյթն էլ գիտեինք, Ադրբեջանն էլ գիտենք: Ուզում եմ ասել՝ մեր սկզբունքն ու մեր մեթոդը չափավորության վրա է հիմնված, բայց եթե հարվածեցիր՝ այնպես կտանք գլխիդ, որ էլ վեր չկենաս։ Բաքուն չգիտի, որ կարող է 3-4 օրում ջնջվել երկրի երեսից։ Սա չափազանցություն չէ»,-նշել է նա:
Հիշեցնենք, որ ավելի վաղ «CNN» հեռուստաընկերությունը բացառիկ հրապարակմամբ հայտնել էր, որ Իրանի դեմ պատերազմի ընթացքում Իսրայելը գաղտնի կերպով հատուկ նշանակության ռազմական և հետախուզական ստորաբաժանումներ է տեղակայել Ադրբեջանում՝ Իրանի սահմանին հարակից շրջաններում։
Հետևեք մեզ տելեգրամում
