Ճապոնիայի տնտեսական անվտանգության նախարար Կիմի Օնոդան հայտարարել է, որ անիմեների կերպարների օգտագործումը թույլատրելի է միայն հեղինակային իրավունքի թույլտվության առկայության դեպքում։ Այս մասին հայտնում է ՏԱՍՍ գործակալությունը:
Ճապոնացի բարձրաստիճան պաշտոնյայի այս արձագանքը հետևել է ԱՄՆ նախագահ Դոնալդ Թրամփի սոցիալական ցանցերում արհեստական բանականությամբ գեներացված տեսանյութի տեղադրմանը, որտեղ նա հանդես է եկել ամենահայտնի անիմեներից մեկի՝ «Նարուտոյի» գլխավոր հերոս Նարուտո Ուզումակիի կերպարով: Նախարարը հույս է հայտնել, որ նմանօրինակ միջադեպերն այլևս չեն կրկնվի։
«Իհարկե, ես տեղյակ եմ այդ հրապարակման մասին։ Սկզբունքն այն է, որ կերպարի օգտագործման համար անհրաժեշտ է հեղինակի թույլտվությունը, և դա վերաբերում է նույնիսկ պետական կառույցների կողմից օգտագործման դեպքերին։ Նույնիսկ եթե սա հեղինակային իրավունքի բացահայտ խախտում չէ, ստեղծագործության օգտագործումն այնպիսի ձևով, որը տարբերվում է հեղինակի նպատակներից, կարող է վնասել արտադրանքի իմիջին և վնաս հասցնել իրավատիրոջը»,- նշել է Օնոդան։
Նախարարի փոխանցմամբ՝ Տոկիոն դիվանագիտական խողովակներով արդեն իսկ բազմիցս Վաշինգտոնին է հասցրել իր դիրքորոշումն այս հարցի շուրջ։ Ճապոնական կողմը մտադիր է շարունակել երկխոսությունն ԱՄՆ-ի հետ՝ ապահովելու ճապոնական անիմեի հեղինակային իրավունքների պատշաճ պաշտպանությունը:
Ավելի վաղ Դոնալդ Թրամփի հրապարակած հոլովակը լայն քննադատության էր արժանացել նաև անիմեի սիրահարների և երկրպագուների շրջանում։
Հետևեք մեզ տելեգրամում
