Հայաստանի Հանրապետությունը և «Airbus Helicopters» ընկերությունը պայմանագիր են ստորագրել վեց H145 բազմաֆունկցիոնալ ուղղաթիռների ձեռքբերման վերաբերյալ։ Այս մասին հայտնել է ընկերությունը իր պաշտոնական կայքում։
Համաձայնագիրը, որը վերջնական տեսքի էր բերվել Ֆրանսիայի նախագահ Էմանուել Մակրոնի՝ Երևան կատարած պաշտոնական այցի ընթացքում, արդեն ուժի մեջ է մտել։ Սա Հայաստանի և «Airbus Helicopters»-ի միջև առաջին պայմանագիրն է:
«Airbus Helicopters»-ի Արևելյան Եվրոպայի, Կենտրոնական Ասիայի և Կովկասի տարածաշրջանի ղեկավար Լյուդովիկ Բուաստոն նշել է, որ ընկերության համար մեծ պատիվ է ողջունել Հայաստանին «Airbus Helicopters»-ի գործընկերների ընտանիքում․
«Այս առաջին պայմանագիրը վկայում է մեր ընկերության և Հայաստանի միջև ձևավորվող գործընկերության ամրապնդման մասին։ Մենք հպարտ ենք աջակցել երկրի օդային հնարավորությունների արդիականացման գործընթացին։ H145-ը բազմիցս ապացուցել է իր արդյունավետությունը և Հայաստանի իշխանություններին կապահովի անհրաժեշտ ճկունությամբ ու հուսալիությամբ՝ ամենաբարդ տրանսպորտային առաքելությունները կատարելու համար», – ասել է նա։
Ընկերության տարածած հաղորդագրության մեջ նշվում է, որ H145 ուղղաթիռը հայտնի է հատկապես բարձր լեռնային և շոգ կլիմայական պայմաններում իր բարձր արդյունավետությամբ, ինչը այն դարձնում է հարմար Հայաստանի լեռնային աշխարհագրական պայմանների համար։
Աշխարհում ներկայումս շահագործվում է H145 ընտանիքի ավելի քան 1800 ուղղաթիռ, որոնք ընդհանուր առմամբ իրականացրել են ավելի քան 8,5 միլիոն թռիչքային ժամ։
Հետևեք մեզ տելեգրամում
