Ռուսաստանի փոխարտգործնախարար Սերգեյ Ռյաբկովը հայտարարել է, որ Ռուսաստանի հետ ուղիղ ռազմական բախման գնալու ցանկացած փորձ կարող է հանգեցնել «աղետալի հետևանքների»։
«Եթե ձևավորվում է մեզ հետ ուղիղ ճակատային բախման գնալու կուրս, ապա դա անխուսափելիորեն աղետալի հետևանքներ կունենա նրանց համար, ովքեր այդ կերպ կփորձեն ոտնձգություն կատարել մեր անվտանգության նկատմամբ», – ասել է Ռյաբկովը «Известия»-ին տված հարցազրույցում։ Նրա խոսքով՝ Արևմուտքի ռազմականացման քաղաքականությունը հիմնված է Ռուսաստանի կողմից իբր գոյություն ունեցող սպառնալիքի մասին «առասպելի» վրա։ Ռյաբկովը նաև մեկնաբանել է Հյուսիսային Եվրոպայի երկրների վրա Ֆրանսիայի միջուկային հովանոցի հնարավոր տարածումը՝ նշելով, որ նման քայլերը կարող են բացասական հետևանքներ ունենալ դրանց նախաձեռնողների համար։
Ռուս դիվանագետը միաժամանակ հույս է հայտնել, որ արևմտյան երկրներում կարող է գերակշռել «առողջ բանականությունը» և կձևավորվի լարվածության նվազեցման անհրաժեշտության գիտակցում։
Ավելի վաղ Ռուսաստանի նախագահ Վլադիմիր Պուտինը հայտարարել էր, որ եվրոպական մի շարք քաղաքական գործիչներ բացահայտ խոսում են Մոսկվայի հետ հնարավոր պատերազմի նախապատրաստության մասին՝ ընդգծելով, որ Ռուսաստանի դեմ ցանկացած հարձակման դեպքում կստանան կոշտ պատասխան։
Հետևեք մեզ տելեգրամում
