ԱՄՆ նախագահ Դոնալդ Թրամփի վարչակազմը պաշտոնապես տեղեկացրել է Կոնգրեսին Թուրքիային ավելի քան 700 միլիոն դոլար արժողությամբ տասնյակ ավիաշարժիչներ վաճառելու մտադրության մասին՝ չնայած մի շարք օրենսդիրների առարկություններին: Այս մասին հայտնում է «Reuters»-ը։
ԱՄՆ պետքարտուղարության՝ հունիսի 24-ով թվագրված պաշտոնական ծանուցման համաձայն՝ կառավարությունը պատրաստ է արտոնագրել շարժիչների արտահանումը: Նախատեսված է, որ ամերիկյան «General Electric» ընկերության արտադրած շարժիչները կօգտագործվեն թուրքական «KAAN» կործանիչի ծրագրում։ Այն Անկարայի ռազմարդյունաբերության կարևոր նախագծերից մեկն է, որի նպատակն է նվազեցնել երկրի կախվածությունը օտարերկրյա ռազմական տեխնիկայից։
Ըստ «Reuters»-ի՝ գործարքը դիտարկվում է նաև որպես քաղաքական ժեստ Թուրքիայի նկատմամբ՝ հաջորդ ամիս Անկարայում նախատեսված ՆԱՏՕ-ի կարևոր գագաթնաժողովին ընդառաջ։ Միաժամանակ, Կոնգրեսի մի շարք դեմոկրատ օրենսդիրներ շարունակում են դեմ արտահայտվել գործարքին՝ հիշեցնելով, որ Թուրքիան 2019 թվականին ձեռք է բերել ռուսական S-400 հակաօդային պաշտպանության համակարգեր, ինչի հետևանքով Վաշինգտոնը պատժամիջոցներ էր սահմանել Անկարայի նկատմամբ և հեռացրել F-35 կործանիչների ծրագրից։
Ներկայացուցիչների պալատի արտաքին հարաբերությունների հանձնաժողովի անդամ Գրեգորի Միքսը քննադատել է վարչակազմին՝ հայտարարելով, որ իրեն բավարար տեղեկատվություն չի տրամադրվել գործարքի հետևանքների վերաբերյալ։
Իր հերթին, կոնգրեսական Քրիս Պապասը հայտարարել է, որ Թուրքիային չի կարելի «պարգևատրել», քանի դեռ այն շարունակում է ունենալ S-400 համակարգերը, իսկ կոնգրեսական Դինա Տիտուսը զգուշացրել է, որ անհրաժեշտության դեպքում Կոնգրես կներկայացնի բանաձև՝ շարժիչների վաճառքն արգելափակելու համար։
ԱՄՆ օրենսդրության համաձայն՝ Կոնգրեսը 15 օր ժամանակ ունի գործարքը արգելափակելու նպատակով համատեղ բանաձև ներկայացնելու համար, սակայն նույնիսկ դրա ընդունման դեպքում նախագահ Թրամփը կարող է օգտվել վետոյի իրավունքից։
Հետևեք մեզ տելեգրամում
